Një hulumtim i ri shkencor ngre alarmin mbi ndikimin e ushqimeve ultra të përpunuara në jetëgjatësi, duke treguar se konsumi i lartë i tyre lidhet me një rrezik më të madh për vdekje të hershme. Këto ushqime, si patatinat, drithërat e ëmbëlsuara për mëngjes dhe sallamet, përmbajnë zakonisht ngjyra dhe aromatizues artificialë dhe janë të pasura me sheqer, yndyra të ngopura dhe kripë.
Sipas një studimi të publikuar në “American Journal of Preventive Medicine”, për çdo rritje prej 10 për qind të përbërjes së dietës nga ushqimet ultra të përpunuara, rreziku i vdekjes së hershme rritet me 2.7 për qind.
Studimi i raportuar nga Euronews Health përfshiu persona të moshës 30 deri në 69 vjeç nga tetë vende të botës.
Analiza krahasoi shtete me nivele të ndryshme konsumi: Kolumbia dhe Brazili me konsum të ulët; Kili dhe Meksika me nivel mesatar; si dhe Australia, Kanadaja, Mbretëria e Bashkuar dhe Shtetet e Bashkuara, ku këto ushqime janë pjesë e përditshme e dietës.
Sipas autorit kryesor të studimit, Eduardo Augusto Fernandes Nilson nga Fondacioni “Oswaldo Cruz” në Brazil, shqetësuese mbetet rritja e shpejtë e konsumit në vendet me të ardhura të ulëta dhe mesatare, transmeton Gazeta Shneta.
Megjithatë, studiues të pavarur theksojnë se bëhet fjalë për një lidhje, jo domosdoshmërisht për shkakësi të drejtpërdrejtë.
Stephen Burgess nga Universiteti i Kembrixhit vëren se faktorë të tjerë, si mungesa e aktivitetit fizik, mund të luajnë rol.
Sërish, fakti që kjo lidhje përsëritet në shumë vende dhe kultura forcon dyshimet për ndikimin negativ të ushqimeve ultra të përpunuara, të cilat më herët janë lidhur edhe me sëmundje të zemrës, probleme neurologjike dhe çrregullime të tretjes. /Gazeta Shneta/