Qendra Kryesore e Mjekësisë Familjare në Podujevë të shtunën nëpërmjet një reagimi në Facebook ka thënë se një infermier është sulmuar fizikisht, ndërsa një infermiere është fyer e kanosur nga një qytetar.
Menaxhmenti i QKMF-së në Podujevë ka reaguar duke dënuar ashpër sulmin ndaj infermierit dhe duke njoftuar për rastin, përcjell Gazeta Shneta.
“Si staf menaxhues në emër të QKMF-së shprehim indinjatë dhe dënojmë ashpër fyerjet dhe sulmin ndaj punëtorëve shëndetësor. Mbrëmë, ndërsa ekipa emergjente ishte në detyrë duke kryer shërbimin ndaj qytetarëve me përgjegjësi të lartë, një person i pa përgjegjshëm pengoi mbarvajtjen e punës duke filluar me fyerje dhe kanosje ndaj infermieres, derisa situata eskaloi në dhunë fizike ndaj një infermieri tjetër të ekipës”, thuhet në reagim.
Gjithashtu, reagimi vazhdon me kritikën ndaj sulmeve të tilla ndaj punëtorëve shëndetësorë në vendet e tyre të punës, duke i cilësuar ato si shqetësuese dhe të papranueshme. Tolerimi i këtyre sjelljeve krijon një precedent të rrezikshëm dhe nxit pasigurinë në punë në mesin e komunitetit shëndetësor.
“Rasti është raportuar menjëherë në polici dhe presim që organet kompetente, policia dhe prokuroria, ta trajtojnë me seriozitet lëndën dhe të marrin masa adekuate sipas dispozitave ligjore. Bazuar në të dhënat e stafit, kemi liruar në shtëpi infermierin dhe infermieren për shkak të shqetësimeve dhe sigurisë, ku u dëshirojmë shërim dhe kthim të shpejtë në vend të punës, profesionin dhe misionin e tyre të shërbimit të shëndetit të qytetarëve”, përfundon reagimi./Gazeta Shneta/