Një studim i ri sugjeron se marrja e një suplementi prebiotik me fibra për 12 javë mund të përmirësojë kujtesën dhe aftësitë mendore te të moshuarit.
Hulumtimi, i publikuar në revistën “Nature Communications”, zbuloi se të rriturit mbi 60 vjeç që morën suplemente prebiotike performuan më mirë në testet e kujtesës dhe të të menduarit, krahasuar me ata që morën placebo, shkruan burimi Health transmeton Gazeta Shneta.
Studiuesit analizuan 72 pjesëmarrës, të organizuar në 36 çifte binjakësh, për të vlerësuar nëse ndryshimet në mikrobiomën e zorrëve — të shkaktuara nga konsumi i fibrave — mund të përmirësonin funksionet njohëse dhe forcën muskulore.
Njëri binjak nga çdo çift mori një nga dy llojet e suplementeve prebiotike (inulinë ose FOS) çdo ditë për 12 javë, ndërsa tjetri mori një placebo. Të gjithë pjesëmarrësit, paralelisht, kryenin ushtrime me rezistencë dhe konsumonin një suplement proteinik.
Në fund të studimit, analizat e jashtëqitjes treguan rritje të baktereve të dobishme të zorrëve, si Bifidobacterium, te pjesëmarrësit që morën prebiotikë. Ky bakter është i njohur për lidhjen e tij me përmirësimin e funksionit kognitiv sipas kërkimeve të mëparshme.
Testimet njohëse, përfshirë “Paired Associates Learning”, treguan rezultate premtuese: pjesëmarrësit që morën fibra bënë rreth gjysmën e gabimeve krahasuar me grupin placebo, veçanërisht në detyrat që lidhen me kujtesën vizuale dhe mësimin e ri. Megjithatë, Dr. Joel Salinas nga NYU Langone Health theksoi se rezultatet u interpretuan në mënyrë jo tradicionale dhe se duhet më shumë hulumtim për të kuptuar sa të zbatueshme janë këto gjetje për popullatën e gjerë.
Ekspertët besojnë se lidhja zorrë-tru mund të shpjegojë këto përmirësime. Mekanizmat e mundshëm përfshijnë fermentimin e fibrave që prodhon përbërje të dobishme për trurin, ndikimin në neurotransmetues dhe uljen e inflamacionit — një faktor i rëndësishëm në rënien njohëse. /Gazeta Shneta/