Gjykata Supreme ka vendosur se pensionistët nuk janë të obliguar të paraqiten çdo gjashtë muaj në institucionet shtetërore për të vërtetuar se janë gjallë, me qëllim të vazhdimit të pensionit.
Me këtë vendim, Gjykata Supreme ka shpallur të paligjshëm udhëzimin administrativ që parashihte këtë rregull dhe penalizimin e pensionistëve në rast të mosparaqitjes.
Vendimi është marrë mbi bazën e padisë së E.Sh., ndërsa Gjykata ka vlerësuar se përgjegjësia për verifikimin e statusit të jetës së pensionistit i takon institucionit publik, përkatësisht Ministrisë, dhe jo qytetarit.
Në arsyetimin e saj, Gjykata Supreme thekson se dispozitat që parashihnin ndalimin e pensionit për shkak të mosparaqitjes nuk janë në përputhje me ligjin.
Sipas Supremes, Ministria është e obliguar të përdorë burimet ekzistuese zyrtare të informacionit për të identifikuar rastet e vdekjes së pensionistëve, përpara se të ndërmarrë masa kufizuese.
“Pas shqyrtimit të rastit, Gjykata Supreme konstatoi se paragrafët ku parashihen pasoja për pensionistët, siç është ndalimi i pensionit, nuk janë në harmoni me ligjin dhe si të tillë janë të paligjshëm. Nëse pensionisti nuk lajmërohet siç është përcaktuar, Ministria obligohet që të monitorojë burimet ekzistuese të informatave me qëllim të identifikimit të pensionistëve që kanë vdekur. Pra, përgjegjësia e parë për verifikimin e statusit të jetës së pensionistit është e vetë organit publik dhe jo e qytetarit. Kjo dispozitë krijon detyrimin që Ministria të shfrytëzojë çdo mekanizëm administrativ dhe çdo burim zyrtar të informatave përpara se të ndërmarrë masa kufizuese ndaj pensionistit. Ligji ka paraparë një mekanizëm që mbështetet në verifikim aktiv nga ana e Ministrisë dhe jo në barrë disproporcionale ndaj pensionistit”, thuhet në njoftimin e Gjykatës Supreme./Gazeta Shneta/