Syla: Askush s’guxon t’i prek infermierët – Havolli: Infermierët po i ikin përgjegjësisë pa arsye

2020-07-24 në ora 09:55

Kryetari i Federatës së Sindikatave të Shëndetësisë Dr. Blerim Syla iu ka dal në mbrojtje infermierëve të cilët po refuzojnë të punojnë në klinikat Covid për arsye të ndryshme shëndetësore.

Reagimi i Sylës ka ardhur pas publikimit në Gazetën Shneta të një emaili të drejtorit të infermierisë në QKUK Sami Tahiraj, i cili kishte kërcënuar infermierët me komision disiplinor dhe heqje të licencës nëse refuzojnë të punojnë në këto klinika pa ndonjë arsye të qëndrueshme.

Por i ashpër ka qenë Syla në mbrojtjë të infermierëve i cili ka thënë se pretendimet për refuzim të punës nga ana e infermierëve nuk janë të sakta. Në një deklaratë në RTV Dukagjini, Syla ka thënë se askush nuk guxon t’i prek infermierët, në të kundërtën FSSHK do të reagoj ashpër.

“Nuk është e saktë që kanë refuzuar të punojnë por është një paqartësi nga ana e menaxhmentit. Unë kam kërkuar zyrtarisht nga drejtori Dr. Valboni se për çfarë bëhet fjalë. Ajo që është e sigurt se ne kemi një kontratë të punës dhe jemi të obliguar të punojnë aty ku kërkohet shërbimi, por punëdhënësi duhet të sigurojë kushtet e punës dhe trajnimet sepse nuk mund ta detyrosh dikend të punojë në klinikat Covid të cilët nuk janë të trajtuar për këtë punë”.

“Nëse ka ndodh një kërcënim i tillë unë prej tash po i lë rehat infermierët sepse askush nuk guxon të merret me ta. Vetëm oda e infermierëve i jep licencat dhe vetëm ajo mund t’i marr. Nëse fillohet kështu me këto kërcënime ne nuk do të rrijm duarkryq”, ka deklaruar Syla.

Në anën tjetër version të kundërt ka dhënë kryetari i Sindikatës së Infermierëve Fitim Havolli. Ai ka thënë se disa infermierë po refuzojnë të punojnë në klinikat Covid pa ndonjë arsye dhe vetëm nga frika se mund të infektohen nga virusi.

Havolli i ka dal në mbrojtje menaxherit të infermierisë në QKUK Sami Tahiraj.

“MSH ka marr një vendim dhe i ka dhënë autoritet QKUK-së që të bëj ristrukturimin dhe lëvizjet brenda QKUK-së për nevojat për Covid. Ata mund të lëvizin këtë komunitet sipas nevojave”.

“Ne kemi reaguar sepse disa infermierë na janë drejtuar me ankesa se iu është shkelur e drejta, por pas reagimit tonë na ka ftuar drejtori i Infermierisë Sami Tahiraj i cili ka bërë një punë të jashtëzakonshme. Tash së fundi këto reagime po dalin se kanë qenë të disa infermierëve që pa arsye janë munduar t’i ikin thirrjes”.

“Sigurisht se kanë frikë me u përball me këtë sëmundje, por nuk mund të besoj se ka infermierë se i ikin përgjegjësisë”, ka deklaruar Havolli në Klan Kosova. /Gazeta Shneta/