Frymëmarrja është veprimi i parë që bëjmë kur lindim dhe i fundit para se të largohemi nga jeta. Megjithëse ndodh pothuajse pa vetëdije, shkenca po zbulon se mënyra se si marrim frymë mund të ndikojë drejtpërdrejt në nivelin e stresit, humorin dhe shëndetin tonë afatgjatë.
Praktikat e kontrollit të frymëmarrjes, kanë rrënjë të lashta në tradita indiane dhe kineze. Sot, studiuesit po konfirmojnë se edhe pak minuta frymëmarrje e ndërgjegjshme në ditë mund të ndihmojnë në qetësimin e sistemit nervor, uljen e hormoneve të stresit dhe përmirësimin e mirëqenies së përgjithshme, raporton BBC Health transmeton Gazeta Shneta.
Stresi kronik lidhet me ankthin, depresionin, sëmundjet kardiovaskulare dhe procese të përshpejtuara të plakjes.
Sipas ekspertëve, një nga arsyet pse ushtrimet e frymëmarrjes funksionojnë është ndikimi i tyre në sistemin nervor autonom.
Frymëmarrja e shpejtë dhe sipërfaqësore aktivizon reagimin “lufto ose ik”, ndërsa frymëmarrja e ngadaltë dhe e thellë përmes hundës nxit gjendjen e qetësisë dhe rikuperimit.
Ndër teknikat më të studiuara janë “psherëtima ciklike”, ku bëhen dy thithje të njëpasnjëshme përmes hundës dhe një nxjerrje e gjatë e frymës nga goja apo dhe frymëmarrja katrore (box breathing), e cila ndjek ritmin 4 sekonda thithje, 4 mbajtje, 4 nxjerrje dhe 4 mbajtje, të përdorura shpesh për menaxhimin e ankthit dhe përmirësimin e gjumit.
Ekspertët theksojnë se nuk është e nevojshme të zotëroni teknika të ndërlikuara. Mjafton të merrni frymë ngadalë përmes hundës, duke e drejtuar frymën drejt barkut dhe duke zgjatur nxjerrjen e saj.
Studimet tregojnë se vetëm 3 deri në 5 minuta praktikë në ditë mund të sjellin përfitime të matshme.
Pavarësisht nëse përballeni me ankth, mendime të tepërta apo presionet e përditshme të punës dhe familjes, ushtrimet e frymëmarrjes përbëjnë një mjet të thjeshtë, falas dhe të arritshëm për të përmirësuar qetësinë mendore dhe shëndetin e përgjithshëm.
/Gazeta Shneta/