Një studim i vogël i rastësishëm në pacientët me sindromën post-COVID ka zbuluar se terapia hiperbarike me oksigjen promovon rivendosjen e aftësisë së zemrës për t’u kontraktuar siç duhet.
Hulumtimi është prezantuar në EACVI 2023, një kongres shkencor i Shoqatës Evropiane të Kardiologjisë (ESC), përcjell Gazeta Shneta.
“Studimi sugjeron që terapia hiperbarike e oksigjenit mund të jetë e dobishme në pacientët me COVID të zgjatur,” tha autorja e studimit, profesoreshë Marina Leitman nga Universiteti i Tel Avivit dhe Qendra Mjekësore Shamir, Be’er Ya’akov, Izrael.
“Ne kemi përdorur një masë të ndjeshme të funksionit kardiak që nuk kryhet në mënyrë rutinore në të gjitha qendrat. Nevojiten më shumë studime për të përcaktuar se cilët pacientë do të përfitojnë më shumë”.
Shumica e të prekurve nga COVID-19 shërohen plotësisht, por pas sëmundjes fillestare, afërsisht 10-20% e pacientëve zhvillojnë COVID-19 të zgjatur, i njohur gjithashtu edhe si sindromë post -COVID-19.
Simptomat përfshijnë gulçim, lodhje, kollë, dhimbje gjoksi, rrahje të shpejta ose të çrregullta të zemrës, dhimbje trupi, skuqje, humbje të shijes ose nuhatjes, nauze, të vjella, diarre, dhimbje koke, marramendje, pagjumësi, mjegull truri, depresion dhe ankth.
Pacientët me sindromën post-COVID mund të zhvillojnë gjithashtu mosfunksionim kardiak dhe janë në rrezik të shtuar të një sërë çrregullimesh kardiovaskulare.
Ky provë klinike e vlerësoi efektin e terapisë hiperbarike të oksigjenit (HBOT) në funksionin kardiak të pacientëve me COVID të zgjatur.
HBOT përfshin thithjen e oksigjenit 100% të pastër në presion të lartë për të rritur shpërndarjen në indet e trupit, gjë që është veçanërisht e dobishme për indet që janë të uritura nga oksigjeni për shkak të lëndimit ose inflamacionit.
Studimi përfshiu 60 pacientë me sindromën post-COVID me simptoma të vazhdueshme për të paktën tre muaj pasi kishin pasur simptoma të lehta deri në mesatare të COVID-19 të konfirmuar nga një test PCR.
“Gjetjet sugjerojnë se HBOT promovon rikuperimin e funksionit kardiak te pacientët me sindromën post-COVID. Nevojiten më shumë kërkime për të mbledhur rezultate afatgjata dhe për të përcaktuar numrin optimal të seancave për efekt maksimal terapeutik”, tha profesoreshë Leitman. /Gazeta Shneta/