Një test i ri gjaku, i marrë përmes shpimit të gishtit dhe i realizueshëm nga shtëpia, mund të ndihmojë në zbulimin e hershëm të sëmundjes së Alzheimerit, sipas një studimi të ri të zhvilluar në disa vende evropiane.
Studimi tregon se disa pika gjaku të mbledhura nga maja e gishtit dhe të dërguara më pas në laborator mund të ofrojnë rezultate të ngjashme me testet tradicionale që përdoren aktualisht për diagnostikimin e kësaj sëmundjeje neurodegjenerative.
Hulumtimi është udhëhequr nga institucioni amerikan Banner Health në bashkëpunim me Universitetin e Exeterit dhe ka përfshirë 337 pacientë nga qendra kërkimore në Danimarkë, Itali, Spanjë, Suedi dhe Mbretërinë e Bashkuar.
Në studim janë përfshirë persona pa dëmtime njohëse, pacientë me dëmtime të lehta të kujtesës, persona me demencë, si dhe të rritur me sindromën Down, të cilët kanë rrezik më të lartë për zhvillimin e Alzheimerit.
Mostrat e gjakut janë mbledhur përmes një metode të thjeshtë nga gishti, janë tharë në karta speciale dhe janë krahasuar me analiza standarde të gjakut dhe lëngut cerebrospinal.
Rezultatet, të publikuara në revistën shkencore Nature Medicine, tregojnë se ky test ka arritur një saktësi prej rreth 86 për qind në identifikimin e shenjave të sëmundjes.
Studiuesit janë fokusuar në tre biomarkues kryesorë të lidhur me Alzheimerin: p-tau217, që përdoret si tregues kryesor diagnostikues, GFAP, i lidhur me inflamacionin e trurit, dhe NfL, që reflekton dëmtimin e qelizave nervore.
Sipas autorëve të studimit, kjo metodë mund të hapë rrugë të reja për kërkime më të gjera dhe përfshirje të komuniteteve që kanë qasje të kufizuar në shërbime të specializuara shëndetësore. Megjithatë, ata theksojnë se testi ende nuk është i gatshëm për përdorim klinik dhe nevojiten studime shtesë.
Aktualisht, rreth 7 milionë persona në Evropë jetojnë me Alzheimer, ndërsa parashikimet tregojnë se numri i rasteve mund të dyfishohet deri në vitin 2030.
Metodat ekzistuese të diagnostikimit, si skanimet e trurit dhe analizat e lëngut spinal, janë invazive, të kushtueshme dhe të disponueshme vetëm në qendra të specializuara./Gazeta Shneta/