Një test i ri i bazuar në analizën e urinës mund të ndryshojë mënyrën se si trajtohet kanceri i fshikëzës, duke ndihmuar mjekët të parashikojnë nëse pacientët do të përfitojnë nga trajtimet ekzistuese apo jo.
Studimi i fundit tregon se ky test mund të zbulojë mbetje minimale të kancerit pas operacionit dhe terapisë me BCG, duke analizuar ADN-në e tumorit në urinë.
Kanceri i fshikëzës është një nga më të përhapurit, duke u renditur i gjashti për nga shpeshtësia dhe ndër shkaktarët kryesorë të vdekjeve nga kanceri.
Rreth 70–75% e rasteve të reja janë në fazë të hershme, të njohura si kancer jo-invaziv i muskulit (NMIBC), ku qelizat kancerogjene janë të kufizuara në shtresat e brendshme të fshikëzës.
Trajtimi fillestar zakonisht përfshin heqjen kirurgjikale të tumorit përmes një procedure të quajtur TURBT.
Më pas, pacientët mund të marrin terapi shtesë direkte në fshikëz për të eliminuar qelizat e mbetura dhe për të ulur rrezikun e rikthimit të sëmundjes.
Për rastet me rrezik më të lartë përdoret imunoterapia me BCG, por reagimi ndaj saj është i paparashikueshëm dhe shpesh shoqërohet me efekte anësore.
Studimi i publikuar në revistën “Cell”, sugjeron se një test i thjeshtë urine mund të dallojë pacientët që shërohen vetëm me operacion, ata që përfitojnë nga BCG dhe ata që nuk reagojnë ndaj trajtimit dhe kanë rrezik të lartë rikthimi.
Rezultatet treguan se pacientët tek të cilët ADN-ja tumorale vazhdonte të ishte e pranishme pas trajtimit me BCG kishin shumë gjasa të përjetonin rikthim të kancerit. Në të kundërt, ata tek të cilët kjo ADN zhdukej kishin rezultate shumë të mira.
Një sfidë e madhe në trajtimin e këtij kanceri është rikthimi i shpeshtë edhe pas operacionit të suksesshëm.
Ky zhvillim hap rrugën për trajtime më të personalizuara: disa pacientë mund të shmangin terapitë e panevojshme, ndërsa të tjerë mund të marrin ndërhyrje më të hershme dhe më efektive. Në të ardhmen, një test i tillë mund të bëhet një mjet kyç në menaxhimin më të saktë dhe më të sigurt të kancerit të fshikëzës.
/Gazeta Shneta/