Testi me pështymë duket të jetë më i saktë se testi standard, i cili përdor mostra gjaku.
Një test me pështymë që mund të bëhet në shtëpi është më i mirë në identifikimin e rrezikut për kancer të prostatës tek disa burra sesa testi standard që përdoret aktualisht, sipas një studimi të ri.
Gjetjet nënkuptojnë se ata që kanë rrezik më të lartë për kancer të prostatës – një nga format më të zakonshme të kancerit tek burrat – mund të kenë së shpejti një mundësi të re për skrining, që ka më pak gjasa të japë rezultate false pozitive, raporton Euronews Health përcjell Gazeta Shneta.
Për studimin, i cili u publikua në revistën “New England Journal of Medicine”, studiuesit morën mostra pështyme nga rreth 6,400 burra në të 50-at dhe 60-at në Mbretërinë e Bashkuar dhe përdorën mostrat e ADN-së për të përllogaritur rrezikun e tyre për kancer të prostatës, që quhet “shkallë rreziku poligjenik”.
Ata më pas kryen skanime dhe biopsi shtesë për burrat me rezultatet më të larta të rrezikut, dhe diagnostikuan 40 për qind prej tyre me kancer të prostatës.
Ndër burrat që u identifikuan si me rrezik të lartë përmes mjetit standard të skriningut për prostatën, vetëm 25 për qind kishin realisht kancer – ndjeshëm më pak se me testin e pështymës.
Kjo do të thotë se prezantimi i testit me pështymë mund të “identifikojë burrat në rrezik për kancere agresive që kanë nevojë për teste të mëtejshme dhe të kursejë burrat me rrezik më të ulët nga trajtime të panevojshme,” tha Rosalind Eeles, njëra nga autoret e studimit dhe profesore e onkogjenetikës në Institute of Cancer Research (ICR). /Gazeta Shneta/