Një studim i ri tregon se thatësira po rrit përqendrimin e mikroorganizmave rezistentë ndaj antibiotikëve në tokë, duke ngritur shqetësime serioze për shëndetin publik në kontekstin e ndryshimeve klimatike.
Studiuesit nga Instituti i Teknologjisë së Kalifornisë në Shtetet e Bashkuara zbuluan një lidhje të fortë midis thatësirës rajonale dhe përhapjes së rezistencës ndaj antibiotikëve në mbi 100 vende, shkruan burimi Euronews Health transmeton Gazeta Shneta.
Rezistenca antimikrobiale (AMR) është një kërcënim në rritje që shkakton mbi 35,000 vdekje çdo vit vetëm në Bashkimin Evropian. Kjo ndodh kur bakteret, viruset, kërpudhat dhe parazitët nuk reagojnë më ndaj ilaçeve. Edhe pse është një proces natyror, përshpejtohet nga keqpërdorimi i antibiotikëve dhe sipas studimit, edhe nga faktorë mjedisorë si thatësira.
Sipas Dianne Newman, thatësira krijon efekte të ngjashme me përdorimin e tepërt të antibiotikëve, duke favorizuar përzgjedhjen e baktereve rezistente.
Ndërkohë, Xiaoyu Shan analizoi të dhëna nga 116 vende dhe zbuloi se nivelet e rezistencës në spitale lidhen ngushtë me indeksin lokal të thatësirës.
Një nga mekanizmat kryesorë është përqendrimi: kur toka thahet, antibiotikët natyrorë bëhen më të fuqishëm në lagështinë e mbetur. Gjithashtu, kushtet e thata ndikojnë në mënyrën se si bakteret reagojnë ndaj antibiotikëve dhe në shpejtësinë e degradimit të tyre.
Këto gjetje janë shqetësuese, pasi një studim i publikuar në “The Lancet”, parashikon deri në 39 milionë vdekje nga AMR midis viteve 2025–2050. Në të njëjtën kohë, deri në fund të shekullit, rreth 5 miliardë njerëz mund të jetojnë në zona të thata.
Studiuesit theksojnë rëndësinë e qasjes “One Health”, që lidh shëndetin e njerëzve, kafshëve dhe mjedisit, si kyçe për të përballuar këtë krizë globale. /Gazeta Shneta/