Më 20 dhjetor 2025, në Fakultetin Filozofik të Universitetit të Prishtinës, u mbajt Asambleja Themeluese e Asociacionit të Psikologëve Klinikë të Kosovës (APKK), me ç’rast u bë themelimi zyrtar i këtij asociacioni profesional. Në asamble morën pjesë mbi 100 psikologë klinikë, profesorë universitarë, mysafirë dhe përfaqësues të institucioneve relevante.
Sipas njoftimit zyrtar, ky themelim i APKK-së bazohet në gjetjet e hulumtimit “Vlerësimi i nevojave të psikologëve klinikë në Kosovë”, i cili rekomandoi krijimin e një shoqate profesionale për të koordinuar dhe përfaqësuar interesat e profesionit.
Mes tjerash, ky asociacion synon adresimin e çështjeve si themelimi i Odës së Psikologëve Klinikë, standardizimi profesional, mbrojtja e interesit publik dhe forcimi i rolit të psikologut klinik në sistemin shëndetësor dhe në sektorë të tjerë.
Gjatë asamblesë u miratuan statuti i asociacionit dhe bordi i parë drejtues me shumicë votash. Bordi përbëhet nga psikologë klinikë që përfaqësojnë sektorin akademik dhe klinik, si dhe sektorin publik dhe privat.
Anëtarët e Bordit të parë drejtues janë: Gyltene Dërguti, Fatime Fazliu, Vigan Behluli, Lirie Lokaj dhe Granit Shatri.
Themelimi i Asociacionit të Psikologëve Klinikë të Kosovës, shënon krijimin e një strukture përfaqësuese profesionale me mandat për zhvillimin e kornizës ligjore, avancimin e standardeve profesionale dhe përmirësimin e shërbimeve të shëndetit mendor në Kosovë. /Gazeta Shneta/