Trajtimet e zakonshme të kancerit të gjirit, duke përfshirë kimioterapinë, rrezatimin dhe kirurgjinë, mund të përshpejtojnë plakjen tek pacientët, sipas një studimi të ri nga studiuesit në UCLA.
Studimi, i botuar në “Journal of the National Cancer Institute”, zbuloi se shënuesit e plakjes qelizore – duke përfshirë dëmtimin e ADN-së dhe inflamacionin – u rritën ndjeshëm tek të gjithë të mbijetuarit e kancerit të gjirit, pavarësisht nga lloji i trajtimit që ata morën.
Hulumtimet e mëparshme kanë lidhur kimioterapinë me plakjen e përshpejtuar, por ky studim është i pari që tregon se sinjalet e plakjes ishin të pranishme edhe tek gratë që kishin rrezatim dhe kirurgji, sipas Judith Carroll, PhD, bashkëautore e studimit dhe profesoreshë e asociuar e psikiatrisë dhe shkencat bio-sjellëse në UCLA.
“Ne u befasuam kur gjetëm ndryshime të ngjashme tek ato që iu nënshtruan vetëm rrezatimit ose operacionit,” tha Carroll për burimin Verywell.
Carroll tha se përparimet në terapitë e kancerit kanë përmirësuar shumë normat e mbijetesës, por shpesh çojnë në plakje më të shpejtë, e cila “mund të ndikojë në aftësitë fizike, pavarësinë dhe jetëgjatësinë”, transmeton Gazeta Shneta.
Studiuesit kryen një studim dyvjeçar që gjurmoi gratë para dhe pas trajtimit të kancerit të gjirit, duke analizuar qelizat e gjakut për shënuesit biologjikë të plakjes. Ata u fokusuan në plakjen qelizore, një proces ku qelizat ndalojnë ndarjen por nuk vdesin. Këto të ashtuquajtura “qeliza zombie” mund të grumbullohen me kalimin e kohës dhe të çlirojnë substanca të dëmshme që dëmtojnë qelizat e shëndetshme dhe kontribuojnë në plakjen.
Studiuesit zbuluan se, pavarësisht nga lloji i trajtimit, të mbijetuarit e kancerit të gjirit shfaqën shenja të dëmtimit të ADN-së dhe plakjes jashtëzakonisht të shpejtë në qelizat e tyre imune.
Onkologët tashmë janë të vetëdijshëm se trajtimi i kancerit të gjirit mund të përshpejtojë plakjen tek gratë apo edhe të përshpejtojë fillimin e menopauzës, tha Dr. Ruth Oratz, profesore klinike e mjekësisë në Shkollën e Mjekësisë Grossman të NYU. /Gazeta Shneta/