Një trajtim inovativ kundër fibrozës cistike do të vihet gjerësisht i disponueshëm në Francë për fëmijët, pasi më parë ishte përshkruar vetëm për pacientët e moshës dymbëdhjetë vjeç e sipër.
“Dekreti është gati dhe duhet të publikohet në ditët në vijim: Kaftrio, një trajtim që ka qenë eksperimental deri më tani, do të përgjithësohet për fëmijët me fibrozë cistike”, tha ministri francez i shëndetësisë, François Braun, shkruan Euronews transmeton Gazeta Shneta.
“Rezultatet janë të jashtëzakonshme, mundësojnë një jetë pothuajse të zakonshme”, shtoi ai.
Ministri tha se bari Kaftrio do të jetë “i disponueshëm në farmaci shumë shpejt, me recetë spitalore”.
Kaftrio, i prodhuar nga laboratori amerikan Vertex, është pjesë e një kategorie inovative të barnave kundër kësaj sëmundje gjenetike, e cila përkeqëson në mënyrë të pashmangshme sistemin e frymëmarrjes dhe të tretjes dhe dikur ishte shpesh fatale për fëmijët dhe adoleshentët.
Një revolucion për pacientët
Bari Kaftrio konsiderohet një trajtim potencialisht revolucionar që mund të transformojë për disa pacientë fibrozën cistike në një sëmundje kronike dhe të stabilizuar.
E dhënë në formën e tabletave gjatë gjithë jetës, kjo terapi e trefishtë, një kombinim i tre molekulave – zvogëlon efektet e sëmundjes, veçanërisht dhimbjet pulmonare.
Agjencia Evropiane e Barnave (EMA), lëshoi autorizim marketingun në muajin gusht 2020 për përdorimin e barit në të gjithë Bashkimin Evropian.
Që nga qershori i vitit 2021, individët me fibrozë cistike të moshës 12 vjeç e sipër dhe që mbartin një mutacion specifik mund të përfitojnë prej saj në Francë, por jo ende fëmijët e moshës 6 deri në 11 vjeç.
Ky njoftim u mirëprit me “një ndjenjë të madhe lehtësimi”, tha në një deklaratë, David Fiant, President i Vaincre la Mucoviscidose, organizata kryesore për sëmundjen në Francë.
100,000 njerëz që jetojnë me fibrozë cistike
“Falë kësaj zgjatjeje të autorizimit të marketingut, më shumë se 700 pacientë të rinj në Francë do të jenë në gjendje të përfitojnë nga kjo terapi inovative”, tha shoqata.
Në total, gjatë tremujorit të parë të vitit 2023, “do të ketë afro 5 000 persona me fibrozë cistike” që do të kenë kështu akses në Kaftrio. /Gazeta Shneta/