Neurologu Blerim Myftiu, ka ndarë në rrjetin social Facebook një studim të fundit rreth procesit të stentimit dhe barnave.
Ndër të tjera, Myftiu ka cituar rekomandimet e fundit tejet të vlefshme, të Shoqatës Amerikane të Neurologjisë, lidhur me hapat vijues ‘pas pësimit të infarktit akut të trurit si pasojë e aterosklerozës së arterieve të mëdha intrakraniale’, përcjell Gazeta Shneta.
Postimi i plotë i Dr. Blerim Myftiut:
TRAJTIMI ME BARNA MË EFIKAS SE STENTIMI
Shoqata Amerikane e Neurologjisë ka dalë me rekomandimet e reja për menaxhimin e mbrojtjes pas pësimit të infarktit akut të trurit si pasojë e aterosklerozës së arterieve të mëdha intrakraniale (brendatrunore).
Në bazë të tyre, dëshmitë aktuale shkencore sugjerojnë që trajtimi i kombinuar me antiagregues dhe statina, tok me kontrollimin e shtypjes së gjakut nën 140/90 mmHg, paraqesin mbrojtje më efektive se sa angjioplastia dhe stentimi i arteries brenda trurit.
Rekomandimet kryesore janë:
– Aspirin 325 mg në ditë për të gjithë pacientët
– Shtimi i Klopidogrel 75 mg në ditë apo Cilostazol 200 mg në ditë për së paku 3 muaj te ata me rrezik të ulët për gjakderdhje
– Terapia agresive me statina duke pasur për cak uljen e LDL kolesterolit nën 70 mg/dl
– Kontrollimi i shrypjes së gjakut nën 140/90 mmHg
– Modifikimi i aktivitetit fizik ditor dhe lënia e duhanit.