Tre vjet pas përurimit të objektit të Klinikës së Mjekësisë Fizikale, Qendra Klinike Universitare e Kosovës ende nuk i ka funksionalizuar dy pishinat në këtë shërbim.
Objekti i ri i Klinikës së Mjekësisë Fizikale me Rehabilitim është përuruar në dhjetor të vitit 2022, por jo të gjitha shërbimet janë funksionalizuar, shkruan Gazeta Shneta.
Dy pishin që gjenden në këtë objekt, ende nuk janë lëshuar në funksion për trajtimin e pacientëve. QKUK ka gjetur disa arsye për vonesën e kësaj pune.
“Ju informojmë se arsyeja e mos funksionalizmit të këtyre pishinave ka qenë natyra specifike teknike dhe infrastrukturore e këtyre hapësirave, të cilat kërkojnë investime të konsiderueshme shtesë, përfshirë sistemet e filtrimit, ngrohjes, trajtimit të ujit dhe standardet e sigurisë sipas protokolleve shëndetësore. Përgjatë viteve, prioritet institucional ka qenë garantimi i shërbimeve bazike dhe emergjente për pacientët, duke orientuar buxhetin drejt pajisjeve dhe trajtimeve që kanë prekur një numër më të madh pacientësh”, thuhet në një përgjigje nga QKUK.
Sipas tyre, janë duke u shqyrtuar mundësitë buxhetore për t’i funksionalizuar këto dy pishina.
“Megjithatë, funksionalizimi i këtyre pishinave mbetet pjesë e planeve zhvillimore të Qendrës Klinike Universitare të Kosovës. Aktualisht janë duke u shqyrtuar mundësitë buxhetore dhe teknike për t’i vënë ato në funksion, në përputhje me standardet e kërkuara. Sapo të plotësohen kushtet financiare dhe teknike, do të ndërmerren hapat konkretë për aktivizimin e tyre”, thuhet në përgjigjen e QKUK-së. /Gazeta Shneta/