8 marsi është shënuar me raste të dhunës në familje. Në tri raste të ndara, dy në Fushë Kosovë e një në Prishtinë, dy persona kanë përfunduar në pranga si të dyshuar. Kështu bëhet e ditur në raportin 24 orësh të policisë.
“Fushë Kosovë 08.03.2026-15:35. Është arrestuar i dyshuari mashkull kosovar pasi që i njëjti pas një mosmarrëveshje dyshohet se ka sulmuar fizikisht dy viktimat femra kosovare. Nuk raportohet për të lënduar ndërsa pas intervistimit me vendim të prokurorit i dyshuari dërgohet në mbajtje”, thuhet në njoftimin e parë.
Edhe në rastin tjetër, dy të dyshuar u arrestuan, një grua dhe një burrë, pasi siç bëhet e ditur në raport, pas një mosmarrëveshjeje ata janë përleshur fizikisht. Por më pas të njëjtit janë liruar me procedurë të rregullt.
“Fushë Kosovë 08.03.2026-17:00. Janë arrestuar dy të dyshuar një mashkull dhe një femër kosovare pasi që të njëjtit pas një mosmarrëveshje dyshohet se janë përleshur fizikisht në mes vete. Me vendim të prokurorit pas intervistimit të dyshuarit janë liruar dhe rasti shkon në procedurë të rregullt”, thuhet në raportin e Policisë së Kosovës.
Por, në mbajtje është dërguar i dyshuari në Prishtinë, i cili sipas raportit policor ka sulmuar fizikisht në grua.
“Prishtinë 08.03.2026-23:00. Është arrestuar i dyshuari mashkull kosovar pasi që i njëjti dyshohet se ka sulmuar fizikisht viktimën femër kosovare. Viktima ka refuzuar tretmanin mjekësor ndërsa , me vendim të prokurorit i dyshuari dërgohet në mbajtje”, thuhet në raportin e policisë për rastet e raportuara në 24 orët e fundit.