Presidenti Donald Trump ka nënshkruar një urdhër ekzekutiv që synon përdorimin e inteligjencës artificiale (IA) në luftën kundër kancerit tek fëmijët.
Ky vendim sjell një fond shtesë prej 50 milionë dollarësh për Iniciativën e të Dhënave mbi Kancerin e Fëmijërisë, duke e çuar totalin në 100 milionë dollarë. Financimi do të përdoret për mbledhjen dhe analizimin e të dhënave mjekësore, me qëllim përmirësimin e diagnozave, përshpejtimin e provave klinike dhe forcimin e masave parandaluese, shkruan burimi Euronews Health transmeton Gazeta Shneta.
“Do ta lidhim inteligjencën artificiale me gjithçka që kemi në dispozicion për të gjetur përgjigje,” tha Trump gjatë takimit në Zyrën Ovale, ku morën pjesë edhe fëmijë që kanë mbijetuar nga kanceri.
Megjithatë, Shtëpia e Bardhë nuk dha detaje se cilat kompani ose teknologji do të përfshihen, duke theksuar se plani është ende në zhvillim. Trump shtoi se kjo teknologji do të bëhet “lehtësisht e qasshme për të gjithë”.
Kanceri i fëmijërisë, megjithëse i rrallë, mbetet shkaku kryesor i vdekjes nga sëmundjet pas fazës së foshnjërisë në SHBA.
Shoqata Amerikane e Kancerit, parashikon se rreth 9,550 fëmijë do të diagnostikohen me kancer në vitin 2025. Në mbarë botën, OBSH raporton se mbi 400,000 fëmijë dhe adoleshentë preken çdo vit.
Pavarësisht kësaj nisme, administrata Trump është kritikuar për shkurtimet e gjera në buxhetet shkencore federale, duke përfshirë edhe ndalimin e disa granteve afatgjata për kërkimin e kancerit pediatrik.
Organizatat shëndetësore kanë paralajmëruar se këto shkurtime rrezikojnë të ngadalësojnë ndjeshëm përparimin kundër sëmundjes. /Gazeta Shneta/