Presidenti amerikan Donald Trump ka ndërmarrë një hap të ri drejt uljes së çmimeve të barnave në Shtetet e Bashkuara, duke nënshkruar një urdhër ekzekutiv që synon të lehtësojë barrën financiare për qytetarët, veçanërisht për të moshuarit dhe shtresat me të ardhura të ulëta.
Urdhri i ri lejon shtetet të importojnë ilaçe nga vende të tjera me çmime më të ulëta, si dhe rishikon mënyrën se si qeveria amerikane negocion çmimet përmes programit federal të sigurimeve shëndetësore Medicare.
“Ky urdhër do të ofrojë lehtësim domethënës për miliona amerikanë që varen nga barna jetike si insulina,” deklaroi një zyrtar i Shtëpisë së Bardhë. “Gjithashtu, do të krijojë një treg më konkurrues të barnave, ku çmimet pasqyrojnë vlerën reale të trajtimeve.”
Në kuadër të këtij urdhri, Administrata e Ushqimit dhe Barnave (FDA) do të autorizojë më shumë shtete që të importojnë barna direkt nga vende si Kanadaja, ku çmimet janë dukshëm më të ulëta. Deri tani, vetëm Florida ka pasur miratim për një marrëveshje të tillë.
Në të njëjtën kohë, urdhri ndërhyn në Aktin e Reduktimit të Inflacionit (IRA) të miratuar gjatë presidencës së Joe Biden, duke synuar eliminimin e dallimeve në negocimin e çmimeve mes barnave orale (si pilulat) dhe atyre të injektueshme.
Përballje me sfidat e industrisë farmaceutike
Megjithatë, urdhri nuk përfshin masën e ashpër të njohur si “most favored nation”, e cila do t’i detyronte kompanitë farmaceutike të ofronin çmimet më të ulëta të mundshme në SHBA, një masë që ka ngjallur kundërshtime të forta nga industria.
Në komentet e tij, Trump ka kritikuar vazhdimisht çmimet ekstreme të barnave në SHBA, duke theksuar se amerikanët paguajnë më shumë për receta mjekësore sesa çdo komb tjetër në botë, shpesh edhe pas pagesës së sigurimeve shëndetësore.
Në sfondin e reformave të Biden
Kujtojmë se administrata Biden kishte filluar një reformë të rëndësishme përmes IRA-s, duke negociuar çmimet e 10 barnave kryesore me kompanitë farmaceutike dhe duke shpallur 15 të tjera pak para largimit nga detyra. Këto çmime të reja pritet të hyjnë në fuqi në vitin 2027.
Ndërkohë, sektori farmaceutik kërkon garanci për të ruajtur pronësinë intelektuale dhe sigurinë ligjore për investime të mëdha në kërkime dhe zhvillime të reja në rast pandemish apo krizash shëndetësore.
Urdhri i fundit i Trump pritet të ndezë debate të reja në Kongres dhe në publik, ndërsa SHBA përpiqet të gjejë një ekuilibër mes kostove të larta të shëndetësisë dhe nevojës për një sistem më të drejtë dhe të përballueshëm për qytetarët.