Departamenti Amerikan i Drejtësisë paditi Uber të enjten, duke e akuzuar aplikacionin e transportit me makinë për diskriminim ndaj personave me aftësi të kufizuara fizike.
“Pavarësisht rëndësisë së shërbimeve të saj për personat me aftësi të kufizuara, Uber u mohon personave me aftësi të kufizuara gëzimin e plotë dhe të barabartë të shërbimeve të saj në disa mënyra kritike”, thuhej në padi, të cilën disa media raportuan se u paraqit në një gjykatë federale në San Francisko.
Thuhej se shoferët “refuzojnë rregullisht” t’u shërbejnë personave me aftësi të kufizuara, përfshirë ata me kafshë shërbimi ose karrige me rrota që mund të ruhen.
Gjithashtu pretendohej se Uber dhe shoferët e tij vendosin tarifa pastrimi për kafshët e shërbimit dhe tarifa anulimi për udhëtarët të cilëve u mohohet shërbimi, shkruan Euronews, transmeton Gazeta Shneta.
Në padi thuhet se shoferët “fyejnë dhe poshtërojnë personat me aftësi të kufizuara ose u bëjnë pyetje të papërshtatshme”.
“Ne kemi një politikë të qartë zero tolerance për mohimet e konfirmuara të shërbimit dhe nuk pajtohemi në thelb me pretendimin e Departamentit të Drejtësisë”, tha Uber.
Nuk është hera e parë që Uber ka pasur probleme për çështje të aftësisë së kufizuar.
Në vitin 2022, ajo pranoi të paguante 2.2 milionë dollarë (1.9 milionë euro) për të zgjidhur pretendimet e ngritura nga qeveria amerikane se tarifat e saj të kohës së pritjes diskriminonin klientët me aftësi të kufizuara.
Ndërkohë, në Mbretërinë e Bashkuar, fituesi i medaljes paralimpike të pingpongut, Jack Hunter-Spivey, tha në mediat sociale në vitin 2021 se Uber dhe shoferët e tjerë të taksive zakonisht largoheshin kur shihnin se ai përdorte një karrige me rrota./Gazeta Shneta/