Udhëzimet e reja thonë se vaji i peshkut dhe suplementet e tjera nuk rekomandohen për uljen e LDL kolesterolit (“kolesteroli i keq”).
Më shumë se gjysma e të rriturve në SHBA përdorin suplemente, dhe shëndeti i zemrës është një nga arsyet kryesore. Kjo ka nxitur udhëzime të reja mjekësore që këshillojnë kundër përdorimit të vajit të peshkut ose suplementeve pa recetë për menaxhimin e kolesterolit, shkruan burimi Very Well Health transmeton Gazeta Shneta.
Sipas këtyre udhëzimeve, këto suplemente nuk e ulin në mënyrë domethënëse LDL kolesterolin dhe nuk janë alternativë efektive ndaj ilaçeve si statinat. Në disa raste, ato madje mund të përkeqësojnë shëndetin kardiovaskular.
Suplementet e vajit të peshkut janë shumë të përdorura; vlerësohet se rreth 1 në 5 të moshuar i përdor për shëndetin e zemrës.
Megjithatë, sipas doktorit Donald M. Lloyd-Jones, një nga autorët e udhëzimeve të reja, nuk ka përfitim real në përdorimin e këtyre suplementeve për uljen e kolesterolit ose rrezikut kardiovaskular.
Studime të shumta tregojnë se ilaçet si statinat janë shumë më efektive për uljen e rrezikut të sëmundjeve të zemrës sesa suplementet pa recetë.
“Ka mjaft prova që tregojnë qartë se suplementet janë humbje kohe dhe parash për trajtimin e kolesterolit dhe për uljen e rrezikut të infarktit dhe goditjes në tru,” tha Lloyd-Jones.
Vaji i peshkut mund të përkeqësojë shëndetin e zemrës
– Në disa raste, suplementet e vajit të peshkut mund të:
– rrisin LDL kolesterolin;
– rrisin rrezikun e fibrilacionit atrial (AFib), një çrregullim i ritmit të zemrës;
Mjeku kardiolog John P. Higgins tha se ka parë këto efekte tek pacientët e tij.
Një problem i zakonshëm është se pacientët krijojnë një “siguri të rreme” dhe shtyjnë trajtimet e provuara, duke menduar se suplementet janë një alternativë natyrale ndaj ilaçeve si statinat.
Kjo vonesë mund të rrisë rrezikun për infarkt ose insuficiencë kardiake në të ardhmen.
Vaji i peshkut me recetë ende rekomandohet
Udhëzimet e reja vlejnë vetëm për suplementet pa recetë.
Forma me recetë e vajit të peshkut, ikosapent etil, ende rekomandohet për disa pacientë me rrezik të lartë kardiovaskular. Ky është një formë e pastruar dhe me dozë të lartë e omega-3 (EPA), që përdoret bashkë me statinat.
Ndryshe nga ilaçet, suplementet nuk kalojnë të njëjtat teste të rrepta sigurie dhe efektiviteti. Ato mund të përmbajnë papastërti dhe zakonisht kanë shumë pak përbërës aktivë.
Sipas Lloyd-Jones, për të arritur ndonjë efekt potencial, do të duheshin rreth 10 kapsula në ditë të suplementit të zakonshëm.
Suplementet nuk duhet të zëvendësojnë dietën apo ilaçet
Në vend të suplementeve, ekspertët rekomandojnë:
– konsum më të madh të peshkut dhe ushqimeve të detit dhe
– përmirësim të dietës së përgjithshme.
Ushqimet e plota përmbajnë lëndë ushqyese që nuk gjenden në suplemente dhe janë lidhur me ulje të rrezikut të goditjes në tru.
Megjithatë, vetëm dieta nuk garanton shëndet të plotë kardiovaskular, pasi faktorët gjenetikë dhe historia familjare ndikojnë në nivelin e kolesterolit. Në disa raste, statinat mbeten të domosdoshme.
“Suplementet e vajit të peshkut nuk ofrojnë përfitimet e provuara të statinave, të cilat ulin realisht infarktet dhe goditjet në tru,” përfundoi Lloyd-Jones. /Gazeta Shneta/