Në Klinikën e Hematologjisë trajtohen pacientë me sëmundje hematologjike malinje dhe jomalinje.
Drejtoresha e kësaj klinike Dr. Afërdita Ukimeraj ka thënë se pacientët me sëmundje hemato-onkologjike trajtohen me protokolle standarde si në gjithë botën. “Por kuptohet se kemi terapi imunologjike, terapi target, kohët e fundit është bërë përparim sa i përket sigurimit të barnave të reja dhe të ofrimit të një niveli sa më të lartë dhe normalisht këto barna kanë një efikasitet shumë më të lartë krahasuar me terapitë standarde”, ka deklaruar ajo.
Ukimeraj ka thënë se sikurse në gjithë botën edhe në vendin tonë kemi një trend në rritje të sëmundjeve malinje që me siguri lidhen me zhvillimin ekonomik, ndotjen e ambientit, jetën sedentare.
“Gjithsesi ka hapësirë për trajtime akoma më të avancuara kur e dimë që bota përdorë barna në nivel më të lartë të nivelit molekular, kështu që gjithsesi që ka hapësirë për më mirë”, ka thënë ajo.
Ukimeraj ka thënë se megjithëse vitet e fundit është shtuar buxheti për barna, ka ende nevojë për investim në barna të reja të cilat kushtojnë shtrenjtë për pacientët.
“Gjithsesi që ka vend, kuptohet që krahasuar me vendet e rajonit nuk jemi edhe shumë keq, por ka hapësirë edhe për më mirë. Shpresojmë që me buxhetin e ri të kemi mundësi më të mira”, ka deklaruar ajo.
Ukimeraj ka folur edhe për ndërtimin e objektit të ri të klinikës së Hematologjisë dhe Nefrologjisë. Ajo ka thënë se klinika e re është shumë e rëndësishme për përmirësimin e kushteve për trajtimin e pacientëve. /klankosova