Kirurgët e Qendrës Klinike Universitare të Kosovës hynë në grevë në fund të dhjetorit të vitit të kaluar dhe nuk u tërhoqën deri më datën 15 shkurt të këtij viti.
Për gati dy muaj mjekët refuzuan të punojnë rastet elektive me kërkesën për rritje të pagave në nivel të prokurorëve dhe gjyqtarëve. Por pas disa takimeve me ministrin e Shëndetësisë dhe drejtorin e SHSKUK-së, disa klinika filluan të tërhiqen nga greva dhe rifilluan punën, shkruan Gazeta Shneta.
Ndërsa më 15 shkurt kolegjiumet kirurgji dhe institutet paraklinike të QKUK-së vendosen që përfundimisht ta përmbyllin grevën. Ata dolën me një deklaratë të përbashkët ku i dhan afat Ministrisë së Shëndetësisë që t’i plotësojnë kërkesat e tyre deri më 6 maj.
“I japim hapësirën e duhur kompetentëve në Ministrinë e Shëndetësisë që të reflektojnë dhe t’i realizojnë detyrimet e tyre ligjore, posaçërisht për mentorimin dhe rrezikshmërinë në punë (ashtu siç u zotuan në takimin e datës 14 shkurt 2019). Në të njëjtën kohë ua bëjmë me dije të gjithëve se përpjekjet tona për realizimin e kërkesës së vetme për të cilën hymë në grevë – rritjen e koeficientit në ligjin për paga, do të vazhdojë deri në fund me të gjitha mjetet ligjore derisa të fitojmë pozicionin e merituar që na takon”, thuhet në letrën e kolegjiumeve.
Ndonëse asnjë nga kërkesat e tyre nuk janë realizuar deri më tani, kirurgët nuk i janë rikthyer grevës.
Kujtojmë se greva e kirurgëve fillimisht u përkrah edhe nga disa spitale regjionale por të cilat iu bashkuan grevës me vetëm 24 orë. Ndërkaq greva nuk u përkrah nga sindikalistët. Këta të fundit shkëmbyen akuza e kundërakuza me përfaqësuesit e grevistëve, në veçanti kirurgun Arbër Morina, i cili përfaqësonte grevistët në media.
Ndërkaq sindikalistët u ndan të kënaqur me koeficientin 5.0 i cili u miratua në Ligjin e ri të Pagave i cili pritet të hyj në fuqi në fund të këtij viti. Me këtë ligj pagat e specialistëve do të dyfishohen nga 600 në 1200 euro. /Gazeta Shneta/
