Gjysma e fëmijëve në botë jetojnë të ekspozuar ndaj të paktën tri rreziqeve klimatike të mbivendosura njëra me tjetrën, duke kërcënuar shëndetin, arsimin dhe mbijetesën e tyre, paralajmëron një raport i ri i UNICEF-it.
Sipas raportit, kriza klimatike po i ekspozon gjithnjë e më shumë fëmijët ndaj valëve të të nxehtit, përmbytjeve, stuhive dhe thatësirave. Mbi një miliard fëmijë në mbarë botën përballen me të paktën tri nga këto rreziqe në të njëjtën kohë, raporton The Guardian transmeton Gazeta Shneta.
Një nga shembujt më dramatikë vjen nga Papua Guinea e Re, ku fëmijët detyrohen të notojnë përmes një lumi të mbushur me krokodilë për të shkuar në shkollë, pasi një urë e rëndësishme u shkatërrua nga reshjet e mëdha dhe nuk u rindërtua më.
“Ëndrra ime është të bëhem mësuese ose pilote. Ne kemi nevojë për një urë të re që të mund të shkojmë në shkollë të sigurt çdo ditë”, thotë 15-vjeçarja, Lorna.
Raporti thekson se temperaturat në rritje dhe fenomenet ekstreme të motit po dëmtojnë infrastrukturën, duke goditur rrugët dhe urat dhe duke vështirësuar jetën e komuniteteve të tëra.
UNICEF analizoi ekspozimin e fëmijëve ndaj tetë rreziqeve klimatike, përfshirë përmbytjet, valët e të nxehtit, zjarret dhe stuhitë tropikale. Rajoni i Sahelit në Afrikë dhe vende si Bangladeshi, Mianmari dhe Pakistani rezultojnë ndër më të prekurit.
Megjithatë, rreziku nuk kufizohet vetëm në vendet e varfra. Në Itali, më shumë se gjashtë milionë fëmijë përballen me valë të zgjatura të të nxehtit dhe thatësira.
UNICEF u bën thirrje qeverive dhe bizneseve të reduktojnë emetimet dhe të investojnë në sisteme më të qëndrueshme shëndetësore, arsimore dhe infrastrukturore për të mbrojtur brezat e ardhshëm. /Gazeta Shneta/