Një nga specialistët e Klinikës së Urologjisë në QKUK, Liridon Selmani, ka reaguar ndaj deklaratës së zv.kryeministrit Besnik Bislimi i cili tha se jo vetëm mjekët kosovarë po e lënë Kosovën, por edhe mjekët gjermanë ikin nga Gjermania.
Selmani ka thënë se Kosova nuk mund të krahasohet me Gjermaninë dhe deklaratat e qeveritarëve janë ofenduese ndaj mjekëve, transmeton Gazeta Shneta.
Urologu ka përmendur disa nga problemet me të cilat përballen klinikat e QKUK-së duke thënë se një numër i anesteziologëve dhe kirurgëve me përvojë e kanë lënë punën në sektorin publik, e poashtu klinikat po përballen me mungesa të shumta duke përfshirë edhe betadinën ose jodin, dhe penjtë kirurgjik.
Lexoni reagimin e tij të plotë:
Si mjek i angazhuar në sistemin shëndetësor nuk mund të mos jesh i ofenduar nga deklaratat e Qeveritarëve lidhur me largimin e mjekëve nga institucionet publike.
Pasi që pajtohem plotësisht me reagimin e Odës së Mjekëve dua të shtoj edhe disa fakte për të sjellë pasqyrimin e plotë të situatës aktuale në shëndetësi:
– Vetëm në muajt e kaluar nga Klinika e Anestezionit jane larguar disa mjek me përvojë dhe tani ndodhemi para situatës ku cdo ditë dështojnë intervenimet kirurgjike si pasojë e mungesës së Anesteziologëve – ata që kanë mbetur janë të mbingarkuar me kujdestari dhe punë enorme.
– Po ashtu, nga institucionet publike janë larguar plotësisht apo kanë marr pushim pa pagesë disa kirurgë cilësorë dhe me përvojë – duke ulur cilësinë e shërbimeve.
– Mjekët e rinj në specializim janë aq shumë për nga numri sa shpesh për ta nuk ka vend në klinika. Nga ana tjetër ata nuk mbajnë kujdestaritë me rregull pasi ato nuk iu paguhen – nesër do të kemi licencim të mjekëve specialistë të cilët do të jenë te mangët profesionalisht pasi nuk kanë kaluar trajnim adekut.
– Klinikat ballafaqohen me mungesë materiali shpenzues (betadinë, penjë etj), kushte të mjerueshme në salla, mungesë investimesh në paisje, mungesë trajnimesh për metoda të reja dhe punë me improvizime.
– E fundit por jo edhe për nga rëndësia Ligji i Pagave tash sa kohë shihet që nuk e ka prioritetin Qeveritar.
Andaj, ju lutem mos bëni krahasime me Gjermaninë – situata e ikjes së mjekëve nga institucionet kosovare është shumë herë më e rënduar dhe ne pas 10 vitesh nuk do të kemi një vend nga ku do të na vinin mjekët zëvendësues.
Uroj që sa më parë të reflektoni fillimisht duke ndryshuar mendësinë, e pastaj duke marr masa konkrete.