Hulumtimet e reja sugjerojnë se vaksina HPV po parandalon kancerin tek meshkujt, si dhe te femrat, por më pak djem po vaksinohen në krahasim me vajzat në Shtetet e Bashkuara.
Vaksina HPV u zhvillua për të parandaluar kancerin e qafës së mitrës tek gratë dhe ekspertët e vlerësojnë atë së bashku me ekzaminimin, për uljen e shkallës së kancerit të qafës së mitrës.
Dëshmitë se vaksinat po parandalojnë kanceret e lidhura me HPV-në tek meshkujt kanë dalë më ngadalë, por hulumtimi i ri sugjeron se meshkujt e vaksinuar kanë më pak kancer të gojës dhe fytit në krahasim me ata që nuk i kanë marrë vaksinat. Këto kancere janë më shumë se dy herë më të zakonshme tek meshkujt sesa tek femrat, raporton Medical Xpress përcjell Gazeta Shneta.
Për studimin, studiuesit krahasuan 3.4 milionë njerëz të moshave të ngjashme – gjysma e vaksinuar kundrejt gjysmës së pavaksinuar – në një grup të madh të dhënash të kujdesit shëndetësor.
Siç pritej, gratë e vaksinuara kishin një rrezik më të ulët të zhvillimit të kancerit të qafës së mitrës brenda të paktën pesë viteve nga marrja e vaksinave. Për burrat, kishte poashtu përfitime.
Burrat e vaksinuar kishin një rrezik më të ulët të zhvillimit të ndonjë kanceri të lidhur me HPV, si kanceri i anusit, penisit, gojës dhe fytit.
“Ne mendojmë se përfitimi maksimal nga vaksina do të ndodhë në dy ose tre dekadat e ardhshme,” tha bashkëautori i studimit, Dr. Joseph Curry, kirurg në Qendrën e Kancerit “Sidney Kimmel” në Filadelfia, SHBA.
“Ajo që ne po tregojmë këtu është një valë e hershme e efektit të vaksinës.”
HPV, ose human papillomavirusi është shumë i zakonshëm dhe përhapet përmes marrëdhënieve intime. Shumica e infeksioneve HPV nuk shkaktojnë simptoma dhe pastrohen pa trajtim. Të tjerë zhvillohen në kancer – rreth 37,000 raste në vit, sipas Qendrave për Kontrollin dhe Parandalimin e Sëmundjeve (CDC).
Në SHBA, vaksina HPV rekomandohet që nga viti 2006 për vajzat në moshën 11 ose 12- vjeç dhe që nga viti 2011 për djemtë e së njëjtës moshë. /Gazeta Shneta/