Në bodrumet e Qendrës Klinike Universitare po vazhdojnë pritjet e pacientëve para ambulancave specialistike.
Një derë e vjetër e cila mban mbishkrimin “Sytë”, është shenja e vetme që tregon drejtimin për tek ambulanca specialistike e Klinikës së Syve. Kjo klinikë është ndër klinikat me fluksin më të madh të pacientëve në QKUK. Ndonëse është ndërtuar një ndërtesë e re për ambulanca specialistike, në të nuk ka pasur vend edhe për ambulancën e Klinikës së Syve, shkruan Gazeta Shneta.
Menaxhmenti i QKUK-së thotë se po i rinovon ambulancat specialistike ORL-së dhe Klinikës së Syve. Por në këtë të fundit pacientët po vazhdojnë të marrin shërbime në bodrum dhe duke pritur me orë të zgjatura për një kontroll tek mjeku.
“Zyra për Informim në QKUK ju njofton se në objektin e ri të administratës operojnë me kapacitet të plotë 36 ambulanca specialistike, të klinikave të ndryshme të Qendrës Klinike Universitare të Kosovës” thuhet në përgjigjen e QKUK-së.
“Ambulancat e Klinikës së ORL-së dhe Oftalmologjisë, i janë nënshtruar renovimit dhe deri në përfundimin e punimeve, të cilat po rrjedhin sipas planit të punës, janë vendosur përkohësisht në objektin e ri të administratës”, thuhet në përgjigjen e QKUK-së, ndonëse puna në ambulancën specialistike të Klinikës së Syve është duke vazhduar në bodrum.
Zyrtarët e QKUK-së thonë se është planifikuar edhe rinovimi në hapësirat ku janë të vendosura ambulancat specialistike të Klinikës së Gjinekologjisë dhe Pediatrisë. /Gazeta Shneta/
