Në Qendrën Klinike Universitare të Kosovës ka vazhduar transferimi i pacientëve me Covid nga objekti i Mjekësisë Sportive në Mjekimin Intensiv Qendror.
Këtë e ka konfirmuar zëdhënësi i QKUK-së Shpend Fazliu, i cili ka deklaruar se edhe sot ka vazhduar transferimi i pacientëve, shkruan Gazeta Shneta.
“Me qëllim të zgjerimit të kapaciteteve me shtretër dhe respiratorë tek mjekësia sportive, konform vendimit të Qeverisë së Kosovës, së datës 5 Korrik 2020, i cili parasheh riorganizim të hapësirave përgjithshme, Komiteti për menaxhim të situatës me Covid-19, në nivel të ShSKUK-së, ka vendosur që pacientët që janë në njësinë intensive të mjekësisë sportive të dërgohen në Mjekimin Intensiv Qendror, kjo hapësirë ka 27 shtretër”, ka deklaruar Fazliu.
Ai ka thënë se pacientët jo Covid, të cilët kanë qenë në Mjekim Intensiv Qendror do të barten në ish-mjekimin e vjetër intensiv, ku deri tani ka qenë njësia koronare. /Gazeta Shneta/