Janë bërë 6 muaj që kur 19-vjeçari Drin Leku ndërroi jetë në rrethana ende të pasqaruara në Qendrën Klinike Universitare të Kosovës dhe për këtë rast asnjë nga organet e hetuesisë nuk i ka përmbyllur raportet.
Kanë kaluar gjashtë muaj nga vdekja e të riut 19-vjeçar Drin Leku në QKUK, e familjarët ende nuk e kanë të qartë arsyen. As Mjekësia Ligjore dhe as Inspektorati Shëndetësor nuk kanë arritur që t’i përmbyllin raportet nga obsukioni, përkatësisht hetimet për rastin e vdekjes së Lekut më 8 gusht të vitit të kaluar, shkruan Gazeta Shneta.
Gazeta Shneta ka raportuar në vazhdimësi në lidhje me rastin e tij. I ndjeri ishte paraqitur në Emergjëncën e QKUK-së për herë të parë më datën 6 gusht. Pas disa ekzaminimeve, një specializant (emër i njohur për redaksinë), e kishte lëshuar për në shtëpi.
Gjendja e pacientit ishte përkeqësuar dhe dy ditë më pas ishte sjellë sërish në Emergjencë. Ai kishte hyrë në spital në këmbët e veta, për të dal në arkivol një ditë më vonë. Ndonëse ishte operuar nga ekipi kujdestar në Klinikën e Kirurgjisë Abdominale, nga hetimet e inspektoratit shëndetësor dyshohet se ndërhyrja ishte vonuar. Madje këtë e kishte konfirmuar edhe axha i të ndjerit, Naser Leku, i cili në një deklaratë për Gazetën kishte thënë se mjekët nuk kanë pranuar ta operojnë pa ardhur një kirurg tjetër i cili kishte dal nga klinika.
Pas vdekjes së të birit, familja ka bërë kallëzim penal ndaj Klinikës së Kirurgjisë, për trajtim jo adekuat të 19-vjeçarit. /Gazeta Shneta/