Një fëmijë 2 vjeç i gjinisë mashkullore ka vdekur gjatë mesnatës në repartin e Intensivës në Klinikën e Pediatrisë në QKUK.
Fëmija ishte pranuar në Klinikën e Pediatrisë më datën 6 të këtij muaji, në gjendje të rëndë, shkruan Gazeta Shneta.
Djali 2-vjeç ishte dërguar në klinikë nga nëna e tij, e cila ishte me qëndrim në Zvicër ndërsa kishte ardhur në Kosovë për pushime.
Ajo kishte lindur binjakë para 2 vitesh, dhe fëmija i ndjerë kishte ardhur në jetë me anomali në zorrën e trashë, si dhe probleme në veshkë dhe fshikëzën e urinës.
Në Zvicër fëmijës i ishin bërë 3 intervenime për të përmirësuar gjendjen.
Shefja e repartit të Intensivës, Dr. Mërgime Batusha, ka treguar për Gazeta Shneta se fëmija ishte pranuar me ngërçe të mëdha.
“Pasi e pranuam, për shkak të ngërçeve e dërguam në neurologji, por brenda 20 minutash gjendja e tij është përkeqësuar dhe është kthyer sërish në intensivë”, ka deklaruar Batusha.
Mjekja ka treguar se fëmija është trajtuar me antibiotikë dhe i janë marr mostrat e gjakut dhe urinës, analizat e të cilave ende nuk janë përfunduar.
Batusha ka treguar tutje se gjendja e fëmijës ka vazhduar njëjtë edhe ditën e nesërme, të martën, ndërsa i është përkeqësuar rëndë të mërkurën.
“Të mërkurën rreth orës 12, fëmijës i është përkeqësuar frymëmarrja. E kemi futur në respirator dhe brenda 1 ore është stabilizuar dhe i janë hequr edhe të nxirat nga fytyra”.
Mjekja ka shtuar se pas kësaj gjendje, fëmijës i janë shtuar antibiotikët dhe pasdite është stabilizuar.
Por vetëm 3 orë para se të ndërronte jetë, fëmijës i ishin shtuar ngërçe të mëdha.
Batusha nuk flet për shkaqet që mund ta kenë çuar fëmijën drejt vdekjes, pasi për këtë është kërkuar obduksioni.
Gjatë ditëve të trajtimit të fëmijës, ekipi i mjekëve të Intensivës janë detyruar që fëmijën ta dërgojnë në Klinikën Emergjente për t’i kryer rëntgen për shkak të mungesës së kësaj pajisje në Pediatri.
Poashtu nëna ishte detyruar që të blinte disa lloje të antibiotikëve për shkak të mungesës së barnave në klinikë.
Rasti i vdekjes së fëmijës është hapur edhe në Policinë e Kosovës e cila e ka trajtuar si vdekje të dyshimtë. /Gazeta Shneta/