Vdekjen e gruas shtatzënë e cila u qëllua me armë dje para hyrjes së Gjinekologjisë në QKUK, e ka konstatuar ekipi i mjekëve të Qendrës së Mjekësisë Urgjente të Prishtinës.
Në rastin e djeshëm të vrasjes së gruas shtatzënë para hyrjes së Gjinekologjisë në QKUK, ka intervenuar ekipa e Qendrës së Mjekësisë Urgjente të Komunës së Prishtinës, shkruan Gazeta Shneta.
Ndonëse rasti ka ndodhur brenda hapësirave të QKUK-së dhe e ndjera ishte paciente e hospitalizuar në Gjinekologji, për konstatimin e vdekjes së saj është thirrur Urgjenca e Prishtinës.
Kjo është konfirmuar nga drejtori i QMU-së Dr. Avdyl Pacolli. Ai ka bërë të ditur se Urgjenca është thirrur nga Policia e Kosovës në orën 18:18 minuta, ndërsa ekipa e mjekëve ka arritur në vendin e ngjarjes në ora 18:23 minuta.
“Po mund t’ju konfirmoj se ekipa jonë e ka konstatuar vdekjen e gruas shtatzënë. Urgjenca ka marr thirrje nga Policia në orën 18:18, ndërsa ekipa ka arritur në ora 18:23. Ka qenë mjekja Tevide Novoberdali e cila e ka konstatuar vdekjen e nënës”, ka deklaruar Pacolli.
Policia dje në njoftimin zyrtar ka bërë të ditur se për rastin është njoftuar në orën 18:00.
Pacolli ka thënë se kjo nuk është hera e parë që marrin thirrje për të intervenuar brenda hapësirave të QKUK-së.
“Kemi edhe raste të tjera që ekipet tona intervenojnë brenda hapësirave të QKUK-së. Ka raste që qytetarët kollabojnë para klinikave, ndodh edhe në dekanat, ose kafshohen nga qentë brenda QKUK-së dhe thirren ekipet tona për të intervenuar”, ka deklaruar Pacolli.
Gazeta sot gjatë ditës ka kërkuar sqarime edhe nga SHSKUK se cila kanë qenë veprimet e stafit të Klinikës së Gjinekologjisë ku 35-vjeçarja e ndjerë ka qenë e shtrirë, por nga ky institucion nuk kanë dhënë asnjë sqarim.
Dje është qëlluar me armë gruaja shtatzënë H.M. 35-vjeçare e cila mbeti e vdekur bashkë me foshnjën e saj. Ajo ishte shtrirë në Gjinekologji në javën e fundit të shtatzënisë. I dyshuar për këtë rast është ish-bashkëshorti i saj Sokol Haliti. Deri më tani ai ende nuk është kapur nga Policia e Kosovës. /Gazeta Shneta/