I përmirësuar – Faton Dalladaku, vëllai i kardiokirurgut Fatmir Dalladaku, është viktimë e grupit mafioz
Policia e Kosovës arrestoi dje disa persona që dyshohet të jenë përfshirë në një rrjet mafioz ku kanë përvetësuar prona dhe pasuri në vlerë mbi 2.5 milionë euro. Ata akuzohen se këtë pasuri e kanë përvetësuar nëpërmjet fajdes dhe detyrimit ndaj viktimave.
Grupi i të arrestuarve përbëhet nga Ismet Osmani i njohur ndryshe me nofkën Curri, Ilir Bojku, Adil Thaqi, Mentor Maqani, Rrahim Hashimi, Ekrem Lika dhe Zekë Jasiqi. “Vlera e përgjithshme e përfituar në mënyra kundërligjore dyshohet/vlerësohet mbi 2.5 milionë euro, ndërsa dëmi i përgjithshëm i shkaktuar dyshohet se tejkalon vlerën prej 6 milion euro”, thuhet në njoftimin e policisë, shkruan Gazeta Shneta.
E viktimë e këtij grupi mafioz është edhe Faton Dalladaku, vëllai i kardiokirurgut Fatmir Dalladaku.
Ndryshe kardiokirurgu Dalladaku në vitin 2005 kishte nënshkruar kontratë me Komunën e Prishtinës për marrje në shfrytëzim të tokës prej 15000 metrash katrorë në afërsi të Qendrës Klinike Universitare të Kosovës.
Ai njihet më së miri për realizimin e operacionit të parë të hapur në zemër në Kosovë në maj të vitit 2003. Dy operacione të bypass u kryen falas nga Dalladaku dhe ekipi i tij në sallën e operacionit në Klinikën e Gjinekologjisë në QKUK. Mjekët nuk kishin pasur komplikime, por për këtë ishin siguruar që nëse do të ndodhte diçka atëherë do të transportoheshin për në Gjermani nëpërmjet KFOR-it gjerman. /Gazeta Shneta/
