Evropianët mund të presin që të ndihen më të vetmuar me kalimin e moshës – por amerikanët mund të përjetojnë boshllëkun më të madh shoqëror gjatë moshës së mesme, sugjeron një hulumtim i ri.
Vetmia është shfaqur si një problem i madh për shëndetin publik, i cili rrit rrezikun për gjithçka, nga depresioni dhe diabeti tip 2 deri te demenca dhe goditja në tru. Megjithatë, shpesh mendohet si një problem që prek vetëm të rinjtë dhe të moshuarit, ndërsa popullata në moshë të mesme shpeshherë lihet pas dore, shkruan Euronews Health përcjell Gazeta Shneta.
Për këtë studim të ri, studiuesit matën nivelet e vetmisë te më shumë se 64,000 persona të moshës 50 deri në 90-vjeç në 29 vende, shumica prej tyre në Evropë. Ata përdorën një shkallë matëse të vetmisë që merrte parasysh se sa shpesh njerëzit ndiheshin të vetmuar nga shoqëria, të përjashtuar ose të izoluar shoqërisht.
Individët në moshë të mesme dhe të moshuar ishin më të vetmuarit në Qipro dhe Greqi, sipas studimit të botuar në revistën “Aging & Mental Health”. Ndërsa më pak të vetmuar ishin në Danimarkë, Zvicër dhe Austri.
Nëpër vende të ndryshme, njerëzit kishin tendencën të ndiheshin më të vetmuar me kalimin e moshës – por sa më shumë shtohej vetmia varej nga vendi ku jetonin, me Bullgarinë dhe Letoninë që përjetonin rritjen më të madhe të vetmisë me moshën.
Në të gjitha moshat, vetmia lidhej me mungesën e punës dhe të qenurit beqar, në depresion ose me shëndet të dobët – por rëndësia e këtyre faktorëve ndryshonte sipas vendit dhe grupmoshës.
Megjithatë edhe në Shtetet e Bashkuara, për shembull, të qenurit i papunë lidhej ngushtësisht me vetminë në moshë të mesme. /Gazeta Shneta/