Virusi ka dalë në sipërfaqe në Evropën veriore dhe perëndimore vitet e fundit si rezultat i temperaturave më të larta.
Virusi i Nilit Perëndimor është zbuluar për herë të parë tek mushkonjat në Mbretërinë e Bashkuar, teksa temperaturat në rritje po shtojnë rrezikun që sëmundjet e transmetuara nga mushkonjat të bëhen më të zakonshme në Evropë, raporton Euronews Health transmeton Gazeta Shneta.
Deri tani, nuk ka pasur asnjë infeksion tek njerëzit në Britani, dhe rreziku për publikun e gjerë është “shumë i ulët,” sipas Agjencisë për Sigurinë Shëndetësore në Mbretërinë e Bashkuar (UKHSA).
Megjithatë, agjencia po e rrit nivelin e monitorimit dhe po u rekomandon mjekëve të bëjnë testime të veçanta për disa pacientë që mund të kenë probleme shëndetësore të lidhura me këtë virus.
Fragmentet e virusit të Nilit Perëndimor u gjetën në dy grupe mushkonjash të mbledhura në zona të lagështa në Nottinghamshire në korrik të vitit 2023, njofton agjencia.
“Edhe pse ky është zbulimi i parë i virusit të Nilit Perëndimor tek mushkonjat në Britani, kjo nuk është e papritur, pasi virusi është tashmë i përhapur gjerësisht në Evropë,” tha Dr. Meera Chand, zëvendësdrejtoreshë e UKHSA për departamentet si zoonozat, infeksionet në zhvillim, frymëmarrjen dhe tuberkulozin.
Virusi i Nilit Perëndimor, i cili bën pjesë në të njëjtën familje me dengën dhe ethet e verdha, zakonisht gjendet tek shpendët dhe përhapet përmes pickimeve të mushkonjave. Edhe njerëzit mund të infektohen, por rreth 80 për qind e tyre nuk do të shfaqin simptoma.
Virusi u identifikua për herë të parë në Ugandë, në vitin 1937, dhe zakonisht gjendet në Afrikë, Lindjen e Mesme, Amerikën e Veriut dhe Azinë Perëndimore.
Përhapja e lidhur me ndryshimet klimatike
Në vitet e fundit, virusi është shfaqur më shpesh në Evropën veriore dhe perëndimore, ndërsa ngrohja e motit për shkak të ndryshimeve klimatike e ka bërë këtë rajon më të përshtatshëm për mushkonjat.
“Zbulimi i virusit të Nilit Perëndimor në Mbretërinë e Bashkuar është pjesë e një peizazhi në ndryshim, ku, si pasojë e ndryshimeve klimatike, sëmundjet e transmetuara nga mushkonjat po shtrihen në zona të reja,” tha Dr. Arran Folly, virolog në Agjencinë e Shëndetit të Kafshëve dhe Bimëve të Mbretërisë së Bashkuar (APHA), në një deklaratë.
Në vendet ku virusi është më i zakonshëm, njerëzit zakonisht infektohen gjatë muajve të verës. Shumica e njerëzve ose nuk kanë simptoma fare, ose kanë simptoma të lehta, të ngjashme me gripin, por në raste të rralla mund të shfaqen probleme neurologjike, siç është fryrja e trurit ose meningjiti.
Në dritën e këtij zbulimi në Mbretërinë e Bashkuar, UKHSA ka bërë të ditur se mjekët po këshillohen që, “si masë paraprake,” të bëjnë testime shtesë për njerëzit që paraqiten me fryrje të pashpjegueshme të trurit, ose encefalit.
Për virusin e Nilit Perëndimor nuk ka vaksinë apo trajtim të posaçëm. /Gazeta Shneta/