Rastet e fruthit janë rritur ndjeshëm në Shtetet e Bashkuara, me mbi 200 raste të raportuara në të paktën 12 shtete. Në këtë situatë, disa njerëz kanë kërkuar vitaminën A si një mënyrë për të parandaluar ose trajtuar fruthin.
Sidoqoftë, ekspertët sqarojnë se vitamina A nuk parandalon fruthin, por mund të ndihmojë personat tashmë të infektuar, sidomos ata me mungesë të kësaj vitamine shkruan burimi Medical News Today përcjell Gazeta Shneta.
Çfarë roli luan vitamina A te fruthi?
Sipas Dr. Danelle Fisher, pediatre dhe Dr. Monica Gandhi, specialiste e sëmundjeve infektive, vitamina A është e rëndësishme për sistemin imunitar, por nuk ofron mbrojtje kundër fruthit.
Megjithatë, infektimi me fruth mund të shkaktojë mungesë të vitaminës A, e cila mund ta bëjë sëmundjen më të rëndë. Në këto raste, dy doza orale të vitaminës A mund të jenë të dobishme.
Organizata Botërore e Shëndetësisë (OBSH) rekomandon dy doza të vitaminës A për fëmijët dhe të rriturit që tashmë janë të infektuar me fruth.
Një rishikim Cochrane ka treguar se trajtimi me vitaminë A është i dobishëm sidomos te fëmijët nën 2 vjeç që kanë fruth të rëndë.
Si mund të mbrohemi nga fruthi?
Vaksinimi mbetet mbrojtja më e mirë kundër fruthit, sipas Qendrave për Kontrollin dhe Parandalimin e Sëmundjeve (CDC).
Marrja e ushqimeve të pasura me vitaminë A (si qumështi, vezët, peshku, portokalli dhe perimet jeshile) është e dobishme për imunitetin, por nuk zëvendëson vaksinën.
Në përfundim, vitamina A nuk parandalon fruthin, por mund të ndihmojë ata që janë tashmë të infektuar dhe kanë mungesë të saj. Vaksina mbetet masa më e fuqishme mbrojtëse për këtë sëmundje ngjitëse. /Gazeta Shneta/