Ministri në detyrë i Shëndetësisë, Arben Vitia, ka bërë të ditur se është hedhur gurthemeli për ndërtimin e një Depoje Qendrore moderne për ruajtjen e barnave, një projekt që synon të përmirësojë ndjeshëm infrastrukturën farmaceutike në vend.
Sipas ministrit Vitia, që nga privatizimi i depos farmaceutike “Farmed” dy dekada më parë, Kosova ka qenë pa një hapësirë qendrore që i plotëson kushtet bazë për ruajtjen e sigurt të barnave. Ai theksoi se ruajtja e barnave është gjetur në kushte të rënda me lagështi dhe hapësira të pasigurta, transmeton Gazeta Shneta.
“Tani po fillon fazë e re me objekt të cilit do t’i shtohet edhe një aneks i ri, duke e shndërruar në Depo Qendrore me standardet më të larta për ruajtjen e barnave. Kjo ndikon direkt në cilësinë e shërbimeve shëndetësore”, ka thënë Vitia përmes një njoftimi zyrtar.
Objekti i ri do të përfshijë:
– Depo prej 1700 m² dhe një aneks shtesë prej 305 m².
– Hapësirë për administratë prej 519 m².
– Vlera e investimit është 1,770,554.42 euro.
Afati i përfundimit të punimeve është 180 ditë. /Gazeta Shneta/