Vitia i propozon Qeverisë rishikimin e orarit të kufizuar të lëvizjes së qytetarëve

2020-03-27 në ora 22:58

Ministri i Shëndetësisë në detyrë, Arben Vitia, sot përmes një postimi në rrjetin e tij social në Facebook i ka propozuar Qeverisë rishikimin e orarit të kufizuar të lëvizjeve të qytetarëve.

Sipas tij, kufizimi i lëvizjes së lirë të qytetarëve dhe automjeteve do të jetë nga ora 17:00 deri në ora 06:00, transmeton Gazeta Shneta.

Më poshtë e gjeni postimin e plotë të tij:

Të nderuar qytetarë,

Ministria e Shëndetësisë në koordinim të plotë me GNMI, MPB dhe ministritë e linjës, konform Planit të Veprimit Kombëtar dhe në pajtim të plotë me masat emergjente të aprovuara nga Qeveria e Kosovës, pas analizimit të situatës epidemiologjike, monitorimit të kujdesshëm të këtyre ditëve, posa i propozoj Kryeministrit Kurti dhe qeverisë së Republikës plotësim-ndryshimin e vendimeve në raport me masat të cilat kanë për qëllim mbrojtjen shëndetit publik.

Ndër to edhe ndryshimi i vendimit sa i përket orareve të qarkullimit të qytetarëve dhe automjeteve. Tani ky kufizim do të jetë nga ora 17:00 deri në orën 06:00.

Të dashur qytetarë,

Bashkëpunimi juaj, vetdisiplina, kujdesi dhe solidariteti janë jetike në këtë betejë.

Është jashtëzakonisht e rëndësishme që të jemi bashkë në administrimin e kësaj situate.

Ju lutem që të mirëkuptoni, ndiqni dhe të zbatoni të gjitha masat e reja. Për çdo shkelje të masave të përcaktuara, do të shqiptohen dënimet konform dispozitave ligjore.

Ju faleminderit për mirëkuptim!/GazetaShneta/