Ministri i Shëndetësisë është kritikuar për mungesë të barnave në Klinikën e Onkologjisë për trajtimin e grave me kancer të gjirit. Vitia ka thënë se furnizimi momental i kësaj klinike është 92 për qind.
Deputetja e AAK-së Time Kadriaj ka thënë se numri i grave me kancer të gjirit po rritet në Kosovë dhe ato po ballafaqohen me mungesë të barnave në Onkologji, raporton Gazeta Shneta.
“Numri i grave me kancer të gjirit po rritet në vazhdimësi. Kushtet në të cilat po trajtohen nuk janë të mira sepse po ballafaqohen me mungesë të barnave. Kostoja e tyre është e papërballueshme dhe e lus ministrin që të merret me këtë çështje”, ka deklaruar Kadriaj.
Por ministri Arben Vitia ka thënë se Ministria e Shëndetësisë po e trajton me seriozitet çështjen e grave të prekura me kancerin e gjirit.
“Për gratë me kancer të gjirit ne si MSh me shumë vëmendje dhe seriozitet iu kemi qas këtij problemi. Në LEB janë shtuar produkte të reja për këtë kategori dhe me gëzim ju them se në këtë moment niveli i furnizimit në Klinikën e Onkologjisë është 92 për qind. Vetëm 6 preparate për shkaqet administrative nuk kanë mundur të procedohen. Pas përfundimit të tyre niveli i furnizimit do të jetë 100 për qind gjë që nuk ka ndodhur më herët”.
“Për diagnostikim kemi shtuar dy rezonanca magnetike të reja, dhe një akselerator të ri për trajtimin e këtyre rasteve. Për herë të parë nga buxheti i Kosovës janë blerë 50 ekspande indore dhe 100 implante për rikonstruktimin e gjirit të grave të cilat kanë bërë mastektomi ose heqje të gjirit. Kjo do të kursejë me dhjetra mijëra euro për pacientet”, ka deklaruar Vitia.
Kadriaj ka reaguar duke thënë se pacientët nuk pyesin për procedurat e ministrisë.
“Ministër pacientët kur shkojnë mi marr barna nuk i interesojnë procedurat e tua. Për çka je zgjedh ti ministër. Nuk ka arsyetim. Shko ti thuju pacientëve më falni se janë vonuar procedurat. Por atyre iu intereson vetëm me marr barin për me u trajtu. Unë nuk po muj me të kuptu”, ka deklaruar Kadriaj. /Gazeta Shneta/