Arben Vitia në një konferencë për media ka zyrtarizuar dorëheqjen e tij nga posti i ministrit të Shëndetësisë.
Vitia ka deklaruar se vendimin për dorëheqjen e ka marr në bashkërendim me kryeministrin Albin Kurti.
“Unë sot po e përmbyll angazhimin tim në këtë detyrë me të cilën me pat ngarkuar kryeministri Kurti, ndaj të cilit do të jem mirënjohës jo vetëm për besimin por edhe për përkrahjen e parezervë”, ka deklaruar Vitia.
“Unë po ia transferoj përgjegjësinë stafit të MSH-së dhe zëvendësministres Dafina Gexha. Ne kemi punuar si një ekip dhe ky ekip do të vazhdojë punën. Unë nga tani e tutje do të jem pjesë e një ekipi tjetër që ka në fokus kryeqytetin tonë”, ka deklaruar Vitia.
Vitia në këtë konferencë ka numëruar disa nga sukseset dhe punët që sipas tij ka kryer gjatë kohës sa ishte në këtë pozitë, si dhe për nevojat dhe menaxhimin e pandemisë, shkruan Gazeta Shneta.
“Jam i lumtur që vala e katërt e pandemisë e dominuar nga varianti Delta, edhe sipas parametrave të OBSH-së për momentin është vënë nën kontroll. Megjithatë ende nuk ka vend për relaksim. Vetëm dy muajt e fundit kemi administruar mbi 900 mijë doza të vaksinave antiCovid. Në qershor ishim vendi i fundit në rajon, ndërsa sot jemi vendi i dytë për vaksinim në bazë të numrit të popullsisë. Kjo është meritë e ekipeve të vaksinimit dhe të menaxhimit. Mbi të gjitha është meritë e juaja qytetarë të nderuar”, ka deklaruar Vitia.
Ai ka thënë se pozita e ministrit të Shëndetësisë për të ka qenë privilegj dhe përgjegjësi e lartë për t’iu shërbyer qytetarëve.
“Unë besoj fuqishëm se së bashku do ta kalojmë këtë test. Suksesi ynë do të varet nga disiplina jonë, të vaksinohemi dhe të respektojmë masat. Sa më shumë qytetarë të vaksinuar, aq më shumë jetë të shpëtuara”, ka deklaruar Vitia. /Gazeta Shneta/