Një studim i ri nga The Jackson Laboratory (JAX) ka hedhur dritë mbi një mekanizëm të panjohur deri tani që shpjegon pse leuçemia akute mieloide (AML) shpesh rikthehet pas kimioterapisë.
Studiuesit zbuluan se një variant i rrallë i gjenit RUNX1, i quajtur RUNX1C, aktivizohet përmes një ndryshimi kimik në ADN (metilimi), duke nxitur qelizat kancerogjene të futen në gjendje “fjetjeje” (qetësie).
Në këtë gjendje, qelizat nuk ndahen, duke i shpëtuar efektit të kimioterapisë, e cila funksionon më mirë kur qelizat janë aktive.
Pas trajtimit, ato mund të “zgjohen” dhe të nxisin rikthimin e kancerit, shkruan MedicalXpress transmeton Gazeta Shneta.
Eksperimentet treguan se bllokimi i RUNX1C me mjete të reja të synimit të ARN-së (antisense oligonucleotides ASOs) i bëri qelizat e leukemisë më të ndjeshme ndaj kimioterapisë. Në kombinim me trajtimet standarde, kjo metodë i detyroi qelizat kancerogjene të rifillonin ndarjen, duke i bërë më të prekshme ndaj ilaçeve.
“Studimi ynë jep një provë të parimit se ndërhyrja në izoformat e ARN-së mund të kapërcejë rezistencën ndaj trajtimeve,” tha profesori Eric Wang, udhëheqës i ekipit kërkimor.
Ky zbulim ofron një drejtim të ri premtues për zhvillimin e terapive më efektive kundër AML-së, një nga format më agresive të leukemisë tek të rriturit, dhe mund të ketë ndikim edhe tek kancere të tjera./Gazeta Shneta/.