Ministri i Shëndetësisë, Uran Ismaili, ka deklaruar se për dyshimet e keqpërdorimit të 400 mijë eurove, do të hetohen nga Policia e Kosovës si dhe lënda është dorëzuar tek Agjencia Kundër Korrupsion.
Rreth 100 mijë euro dyshohet se janë keqpërdorur në Ministrinë e Shëndetësisë si dhe 300 mijë të tjera në Agjencionin Kosovar për Produkte dhe Pajisje Mjekësore, shkruan Gazeta Shneta.
Këto para u paguan për avanse në udhëtime, pa arsyetime dhe fatura.
Reagimi i plotë i Ismailit:
Në përballjen tonë me problemet e shumta që ka Ministria e Shëndetësisë, së fundi jam njoftuar lidhur me dyshimet për keqpërdorimin e avanseve gjatë viteve 2016-2017.
Është kërkuar dhe ka filluar auditimi i këtij procesi nga njësia e brendshme e auditimit e Ministrisë së Shëndetësisë, si dhe në bazë të kërkesës së Agjencisë Kundër Korrupsionit, është deponuar e gjithë lënda në këtë Agjenci.
Sot është njoftuar edhe Policia e Kosovës dhe presim reagim nga të gjitha organet relevante që abuzimet e mundshme të parasë publike të zbulohen sa më parë.
Po ashtu, janë suspenduar dhe janë vënë para komisioneve disiplinore edhe disa zyrtarë të dyshuar në lidhje me këto keqpërdorime.
Çdo euro e keqpërdorur do të kërkojmë që t’i kthehet buxhetit të shëndetësisë.
Si Ministër i Shëndetësisë, zotohem se nëpërmjet mekanizmave të kontrollit dhe mbikëqyrjes rigoroze, të cilat tashmë i kemi filluar, do t’i luftojmë keqpërdorimet e parasë publike dhe shpërdorimet e pozitës zyrtare.