Zyra Kombëtare e Auditimit (ZKA) ka publikuar raportin e auditimit për Ministrinë e Shëndetësisë për vitin 2025, duke evidentuar parregullsi në menaxhimin e stokut farmaceutik, pranimin e furnizimeve, realizimin e kontratave dhe administrimin e pasurive.
Një nga gjetjet kryesore lidhet me menaxhimin e barnave, shkruan Gazeta Shneta.
Sipas auditorit, në regjistrat e stokut farmaceutik figuronin katër artikuj në vlerë totale prej 95,520 eurosh, të cilëve u kishte kaluar afati i përdorimit, por që nuk ishin evidentuar si produkte të skaduara në sistemin për menaxhimin e stokut.
Si pasojë, këto barna vazhdonin të paraqiteshin si pjesë e stokut zyrtar të Ministrisë së Shëndetësisë.
Auditimi ka evidentuar gjithashtu mangësi të tjera në administrimin e stokut farmaceutik, përfshirë produkte të regjistruara pa çmim, mospërputhje në datat e skadencës dhe dalje të barnave me sasi decimale.
Raporti ka identifikuar parregullsi edhe në procesin e pranimit të furnizimeve. Sipas ZKA-së, në katër raste me vlerë totale prej 778,946 eurosh mungonin raportet zyrtare të pranimit të mallrave nga komisionet përgjegjëse.
Prej kësaj shume, tri pagesa në vlerë prej 759,400 eurosh kishin të bënin me furnizime me barna, ndërsa një pagesë prej 19,546 eurosh lidhej me furnizim me inventar për institucionet korrektuese.
Auditori ka konstatuar se në vend të raporteve zyrtare të pranimit, komisionet kishin nënshkruar vetëm fletë-dërgesat e operatorëve ekonomikë.
Sipas raportit, një praktikë e tillë rrit rrezikun që mallrat të pranohen pa u verifikuar plotësisht sasia dhe cilësia e tyre, si dhe mund të krijojë hapësirë për pagesa të pajustifikuara ose pranimin e furnizimeve që nuk përputhen me kushtet e kontratës./Gazeta Shneta/