Mikrobioma – bakteret që jetojnë në zorrët tona – po konsiderohet gjithnjë e më shumë si një faktor kyç për shëndetin e përgjithshëm dhe funksionimin e trurit, tregojnë studime të fundit ndërkombëtare.
Shpesh e quajtur si “truri i dytë”, zorra luan rol të rëndësishëm jo vetëm në tretje, por edhe në proceset e kujtesës dhe plakjes së trurit.
Një studim nga Stanford Medicine dhe Arc Institute sugjeron se ndryshimet në bakteret e zorrëve me kalimin e moshës mund të ndikojnë drejtpërdrejt në rënien e kujtesës, shkruan Euronews Health transmeton Gazeta Shneta.
Sipas studiuesit Christoph Thaiss, procesi i humbjes së kujtesës nuk varet vetëm nga truri, por edhe nga sinjalet që vijnë nga zorra.
Studiuesit zbuluan se me plakjen, përbërja e baktereve në zorrë ndryshon, duke shkaktuar inflamacion që pengon komunikimin mes zorrëve dhe trurit. Kjo ndikon negativisht në funksionimin e një nervi të rëndësishëm që lidhet me kujtesën.
Në eksperimente laboratorike, stimulimi i këtij nervi përmirësoi ndjeshëm kujtesën, duke treguar potencial për trajtime të reja në të ardhmen.
Një tjetër studim nga University of Cambridge ka identifikuar një grup të ri bakteresh, të quajtur CAG-170, që gjenden më shpesh tek personat e shëndetshëm.
Këto baktere ndihmojnë në ruajtjen e ekuilibrit në zorrë dhe prodhojnë vitaminë B12, duke luajtur rol të rëndësishëm në shëndetin e organizmit.
Ndërkohë, studiues nga University of Birmingham dhe University Hospitals Birmingham NHS Foundation Trust kanë përdorur inteligjencën artificiale për të analizuar mikrobiomën dhe për të identifikuar shenja që lidhen me sëmundje si kanceri i zorrës së trashë, kanceri i stomakut dhe sëmundjet inflamatore të zorrëve.
Ekspertët theksojnë se këto zbulime hapin rrugë për metoda të reja për ruajtjen e shëndetit të trurit dhe parandalimin e sëmundjeve, përmes dietës, probiotikëve apo trajtimeve që ndikojnë në komunikimin mes zorrëve dhe trurit.
Në tërësi, studimet e fundit e vendosin mikrobiomën në qendër të kujdesit shëndetësor, duke treguar se ajo ndikon jo vetëm në tretje, por edhe në mënyrën si funksionon truri dhe si plaket organizmi.