Mark Zuckerberg, bashkëthemeluesi i Facebook-ut, mbërriti të mërkurën në një gjykatë në Kaliforni, ku pritet të dëshmojë në një çështje ligjore historike mbi pretendimet se mediat sociale krijojnë varësi te fëmijët.
Kjo është paraqitja e parë e Zuckerberg-ut përpara një jurie pas viteve të reagimeve negative ndaj kompanisë së tij, Meta Platforms, e cila zotëron gjithashtu Instagram-in dhe WhatsApp-in, raporton BBC.
Avokatët e Metës kanë argumentuar se paditësja kryesore në këtë çështje, e identifikuar me inicialet K.G.M., është dëmtuar nga faktorë të tjerë në jetën e saj dhe jo nga përdorimi i Instagram-it.
Gjyqi në Los Angeles, ku i pandehur është edhe YouTube-i i Google-it, po ndiqet nga afër për shkak të implikimeve që mund të ketë për mijëra padi të ngjashme me të cilat përballen gjigantët e mediave sociale.
TikTok dhe Snapchat, të cilat ishin përfshirë fillimisht në padi, arritën marrëveshje pak para nisjes së gjyqit. Kushtet e këtyre marrëveshjeve nuk janë bërë publike.
Avokatët e K.G.M., e cila kishte nisur të përdorte Instagram-in dhe YouTube-in që në moshë të vogël, akuzojnë kompanitë e mediave sociale se projektojnë platformat e tyre për të nxitur varësinë te përdoruesit e rinj, pavarësisht se janë të vetëdijshme për rreziqet ndaj shëndetit mendor.
Zuckerberg-u, i cili mbërriti në gjykatë i shoqëruar nga sigurimi dhe bashkëpunëtorë, pritet të përballet me pyetje lidhur me dizajnin e Instagram-it dhe ndryshimet e bëra ndër vite për të rritur angazhimin e përdoruesve.
Në fokus pritet të jetë edhe modeli i biznesit i Metës, i bazuar në reklama dhe i varur nga metrika si koha që përdoruesit kalojnë në platforma.
Gjatë dëshmisë së javës së kaluar, Adam Mosseri, drejtuesi i Instagram-it, kundërshtoi idenë se përdorimi i mediave sociale përbën domosdoshmërisht varësi, duke argumentuar se edhe 16 orë përdorim brenda një dite të vetme nuk janë provë e mjaftueshme për ta cilësuar atë si të tillë. /Gazeta Shneta/