Zyra Ligjore e kryeministrit ka konstatuar se Udhëzimi Administrativ 05/2017 për shkollim specialistik është në kundërshtim me Ligjin për Shëndetësi, pasi nuk ka trajtuar në plotëni rolin e odave të profesionistëve shëndetësor dhe kompetencat e tyre në këtë proces.
Odat e profesionistëve shëndetësorë i janë drejtuar Zyrës Ligjore të kryeministrit me kërkesë për të anuluar Udhëzimin Administrativ 05/2017 për shkollim specialistik, me arsyetimin se i njëjti është në kundërshtim me Ligjin për Shëndetësi dhe Ligjin për odat e profesionistëve shëndetësorë, shkruan Gazeta Shneta.
Kjo kërkesë e tyre ka ardhur pas shpalljes së konkursit për specializime nga MSH, për 1034 pozita të lira për specializantë, shumica prej të cilave me vetfinancim në bazë të Udhëzimit Administrativ 05/2017.
Në kërkesën e parashtruar nga odat, është arsyetuar se UA 05/2017 ka cënuar autorizimet ligjore të cilat dalin nga neni 9, paragrafi 1, nën paragrafi 1.7, i Ligjit për odat e profesionistëve, ku përkufizohet se në kuadër të kompetencave publike, Odat kanë kompetencë lidhur me ‘verifikimin e ligjshmërisë të procesit të specializimit, organizon provimin specialistik, organizon dhe mbikëqyr sub-specializimet’.
“Poashtu, sipas dispozitave të Ligjit për Shëndetësi, sipas nenit 72, paragrafit 5, verifikimi i ligjshmërisë së procesit të specializimit dhe organizimi i provimit specialistik bëhet nga odat përkatëse profesionale”, thuhet në dokumentin e Zyrës Ligjore të cilin e posedon Gazeta Shneta.
Meqë MSH ka paraparë në programin legjislativ projektligjin për plotësimin dhe ndryshimin e Ligjit për Shëndetësi, atëherë Zyra Ligjore ka kërkuar nga MSH që të adresojë edhe këtë çështje pasi nevojitet harmonizim juridik në procesin e specializimeve.
“Udhëzimi administrativ Nr. 05/2017 për shkollim specialistik, nuk e ka trajtuar rolin që kanë Odat e profesionistëve shëndetësor dhe kompetencat e tyre që i kanë sipas Ligjit Nr. 04/125 për Shëndetësi. Mbetet në përgjegjësi të organit propozues të këtij akti nënligjor, të fillojë procedurën e ndryshimit dhe plotësimit të tij dhe ndërmarrë hapat e tjerë në përputhje me Rregulloren Nr. 09/2011 e Punës së Qeverisë së Republikës së Kosovës dhe për këtë të njoftojë kryeministrin dhe Qeverinë”, thuhet në pikën 8.5 të interpretimit të Zyrës Ligjore.
Kujtojmë se odat e profesionistëve shëndetësorë kanë kundërshtuar hapur konkursin për specializime, pasi kanë deklaruar se nuk janë përfshirë në proces dhe nuk janë marr parasyshë rekomandimet e tyre për formimin e komiteteve specialistike.
Madje kryetari i Odës së Mjekëve të Kosovës Dr. Pleurat Sejdiu, e pati quajtur proces të kriminalizuar pas shpalljes së konkursit nga Ministria e Shëndetësisë. /Gazeta Shneta/
