Gati 10 milionë njerëz me diabet në SHBA kanë retinopati diabetike, një dëmtim i syve që vie si rezultat i sëmundjes, zbulon një studim i ri.
Ky numër është shumë më i lartë se vlerësimi i mëparshëm nga viti 2004, i cili tregonte se 4.1 milionë njerëz po jetonin me këtë sëmundje të syve, shkruan burimi Health përcjell Gazeta Shneta.
Diabeti i patrajtuar ose i kontrolluar keq është arsyeja kryesore pse njerëzit zhvillojnë retinopati diabetike, por mungesa e kontrolleve dhe ekzaminimeve të rregullta të syve gjithashtu luan një rol.
Diabeti është një sëmundje e zakonshme që prek më shumë se 11% të popullsisë së SHBA, ose 37.3 milionë njerëz.
Kjo gjendje shkakton rritjen e nivelit të sheqerit në gjak, e cila mund të çojë në shumë komplikime—përfshirë zhvillimin e retinopatisë diabetike, një nga shkaqet kryesore të verbërisë te të rriturit.
“Retinopatia diabetike është një sëmundje e retinës, e cila është shtresa nervore në pjesën e pasme të syrit,” shpjegon Dr. Mitul Mehta, oftalmolog dhe profesor në Institutin “Gavin Herbert Eye”, të Universitetit të Kalifornisë-Irvine.
“Kjo është kryesisht një sëmundje e enëve të gjakut, sepse diabeti i dëmton ato dhe këto inde të gjalla kanë nevojë për enë të shëndetshme të gjakut për të funksionuar.”
Rreziku i retinopatisë diabetike është më i madh nga sa mendohej më parë
Sipas një studimi të publikuar më 15 qershor në revistën “JAMA Ophthalmology”, rreziku për retinopati diabetike është më i lartë se sa vlerësimet e mëparshme sugjeronin.
Duke përdorur të dhëna nga Qendrat për Kontrollin dhe Parandalimin e Sëmundjeve (CDC) dhe Byroja e Regjistrimit të SHBA, studiuesit vlerësuan se në vitin 2021 rreth 9.6 milionë njerëz (ose 26.43% e personave me diabet) kishin retinopati diabetike.
Nga këta, 1.84 milionë persona (rreth 5%) kishin forma që rrezikonin shikimin.
Çfarë është retinopatia diabetike?
Retinopatia diabetike mund të zhvillohet si te personat me diabet të tipit 1, ashtu edhe te ata me diabet të tipit 2 dhe mund të shkaktojë humbje të shikimit nëse nuk diagnostikohet dhe trajtohet në kohë.
“Retinopatia diabetike është një sëmundje progresive që përkeqësohet me kalimin e kohës,” shpjegon Dr. Michael Abramoff, oftalmolog dhe profesor në Universitetin e Iowa.
“Në fazat më të rënda, retina mund të shqyhet ose të pësojë hemorragji, duke shkaktuar humbje të pakthyeshme të shikimit.”
Ai thekson se simptomat vizuale zakonisht shfaqen në faza të avancuara të sëmundjes.
“Shpesh, retinopatia diabetike zhvillohet pa ndonjë simptomë të dukshme, por dëmtimet në qelizat nervore të retinës ndodhin që në fazat e hershme,” thotë ai. /Gazeta Shneta/