Numri i personave me diabet tip 2 është në rritje në mbarë botën, duke përbërë shqetësim madhor shëndetësor. Nëse nuk menaxhohet siç duhet, kjo gjendje mund të çojë në sëmundje të zemrës, verbëri, dështim të veshkave, amputime dhe vdekje.
Prediabeti paraqet një fazë të ndërmjetme, ku niveli i sheqerit në gjak është mbi normën, por jo aq sa të klasifikohet si diabet. Rreth 25–50% e personave me prediabet zhvillojnë diabet tip 2, shkruan burimi Medical News Today transmeton Gazeta Shneta.
Një studim i ri, i publikuar në “Cardiovascular Diabetology – Endocrinology Reports”, tregon se 150 minuta ushtrime fizike në javë mund të ndihmojnë në rikthimin e niveleve të shëndetshme të glukozës në gjak dhe në parandalimin e progresit drejt diabetit.
Studimi përfshiu 130 të rritur në Kolumbi, të ndjekur për një vit. Mosha mesatare ishte 69.5 vjeç; shumica kishin hipertension dhe gati gjysma kishin mbipeshë.
Në fillim, të gjithë pjesëmarrësit kishin prediabet me HbA1c mesatare 5.9%. Ata u monitoruan rregullisht nga specialistë të mjekësisë së brendshme, dietologë, psikologë dhe fizioterapistë, ndërsa u mat edhe indeksi glukozë/trigliceride për të vlerësuar rezistencën ndaj insulinës.
Pas një viti, 21.5% e pjesëmarrësve arritën remisionin e prediabetit, 13.8% kaluan në diabet tip 2, ndërsa 64.6% mbetën në gjendjen fillestare. Studiuesit theksojnë se ushtrimet janë një ndërhyrje e thjeshtë, por jashtëzakonisht e efektshme për përmirësimin e shëndetit metabolik. /Gazeta Shneta/