Microsoft deklaron se është një hap më afër “superinteligjencës mjekësore” pasi një mjet i ri i inteligjencës artificiale (IA) ka diagnostikuar më saktë se mjekët problemet e ndërlikuara mjekësore.
Në një eksperiment të fundit, Microsoft krahasoi sistemin e vet IA me 21 mjekë të përvojës nga SHBA dhe Britania, duke përdorur raste reale të publikuara në revistën “New England Journal of Medicine”. Rezultatet treguan se IA dha diagnozën e saktë në 85.5% të rasteve – rreth katër herë më shumë se mjekët, të cilët kishin mes 5 dhe 20 vjet përvojë, raporton Euronews Health transmeton Gazeta Shneta.
Sipas Microsoft, IA mund të trajtojë raste komplekse përtej specializimeve të mjekëve individualë, duke kombinuar gjerësinë dhe thellësinë e dijes mjekësore. Për më tepër, ajo kërkoi më pak analiza dhe ekzaminime, duke ulur edhe kostot.
Sistemi funksionoi duke simuluar mënyrën si vepron një mjek: mblodhi të dhëna, porositi analiza dhe arriti në diagnozë.
Një “agjent kontrollues” mori informacion nga rastet, ndërsa një “koordinues diagnostik” drejtoi pyetje dhe analiza. U testuan modele të njohura si GPT, Llama, Claude, Gemini, Grok dhe DeepSeek.
Modeli “o3” i OpenAI, i integruar në ChatGPT, ishte më i suksesshmi, duke zgjidhur me saktësi 85.5% të rasteve. Mjekët, ndërkohë, nuk kishin ndihmën e kolegëve, librave apo mjeteve të tjera diagnostikuese për të siguruar një krahasim të drejtë.
Microsoft thekson se IA nuk do të zëvendësojë mjekët, por do t’i ndihmojë në detyrat rutinë, personalizimin e trajtimeve dhe përshpejtimin e diagnozave. Kompania kërkon më shumë prova reale para se t’i bëjë këto sisteme gjerësisht të disponueshme. /Gazeta Shneta/