Një defekt teknik ka ndodhur në Klinikën e Oftalmologjisë të Qendrës Klinike Universitare të Kosovës si pasojë e shpërthimit të një gypi të ujit.
Sipas zëdhënëses për komunikim, Mirlinda Qyqalla, menjëherë pas njoftimit, ekipi i shërbimeve teknike të QKUK-së ka dalë në vendin e ngjarjes dhe ka intervenuar, duke e sanuar plotësisht problemin, shkruan Gazeta Shneta.
Ajo theksoi se nuk ka ndërprerje të punës, tri sallat e operacionit janë funksionale dhe po kryejnë ndërhyrjet kirurgjikale sipas planit dhe rregullit të zakonshëm.
“Shërbimet shëndetësore për pacientët po vazhdojnë pa pengesa dhe situata është nën kontroll të plotë”, tha Qyqalla për Gazetën Shneta.
