Konsumimi i moderuar i kafesë mund të ketë përfitime për shëndetin mendor, sugjeron një studim i ri shkencor.
Hulumtimi, i publikuar në revistën Journal of Affective Disorders, ka gjetur se konsumimi i dy deri në tre filxhanëve kafe në ditë lidhet me një rrezik më të ulët për çrregullime mendore, veçanërisht te meshkujt.
Studimi analizoi të dhënat e mbi 460 mijë personave nga databaza e UK Biobank, të cilët u ndoqën për më shumë se 13 vite.
Rezultatet treguan se personat që konsumonin sasi të moderuar kafeje kishin më pak gjasa të zhvillonin çrregullime si ankthi dhe depresioni.
Në të kundërt, konsumimi i lartë – pesë ose më shumë filxhanë në ditë – u lidh me rrezik më të shtuar për probleme të shëndetit mendor.
Sipas studiuesve, lidhja mes kafesë dhe shëndetit mendor ndjek një model të ashtuquajtur “J-formë”, që do të thotë se as konsumimi shumë i ulët dhe as ai shumë i lartë nuk sjellin përfitimet që vërehen te konsumimi i moderuar.
Kafeja përmban mbi një mijë përbërës bioaktivë, përfshirë kafeinën dhe polifenolët, të cilët mund të kenë efekte anti-inflamatore dhe mbrojtëse për trurin.
Këto substanca mund të ndikojnë në mënyrën se si truri reagon ndaj stresit dhe mund të ndihmojnë në uljen e rrezikut për çrregullime mendore.
Megjithatë, studiuesit theksojnë se rezultatet tregojnë vetëm një lidhje dhe jo një shkak të drejtpërdrejtë.
Ekspertët rekomandojnë që kafeja të konsumohet me moderim, si pjesë e një stili jetese të shëndetshëm, ndërsa për çdo shqetësim të shëndetit mendor këshillohet konsultimi me profesionistët shëndetësorë./Gazeta Shneta/